शिंदे गट, शिवसेनेतील ‘हे’ दोन नेते एकाच विमानातून दसरा मेळाव्यासाठी रवाना
आज मुंबईत शिवसेना आणि शिंदे गटाचा मेळावा पार पडणार आहे. गेल्या काही दिवसांपासून राज्यात घडत असलेल्या घडामोडींच्या पार्श्वभूमीवर राज्याचं लक्ष या दोन मेळाव्यांकडे लागले आहे.
मुंबई : आज मुंबईत (Mumbai) शिवसेना (Shivsena) आणि शिंदे गटाचा मेळावा पार पडणार आहे. गेल्या काही दिवसांपासून राज्यात घडत असलेल्या घडामोडींच्या पार्श्वभूमीवर राज्याचं लक्ष या दोन मेळाव्यांकडे लागले आहे. यंदाचा दसरा मेळावा दोन्ही गटाकडून प्रतिष्ठेचा बनवण्यात आला आहे. दोन्ही गटातील नेत्यांनी दसरा मेळाव्यासाठी आपली प्रतिष्ठा पणाला लावली आहे. एकोंमेकांवर घणाघाती टीका सुरूच आहे. दसरा मेळाव्याला रवाना होण्यापूर्वी शिंदे गटाचे मंत्री संदीपान भुमरे (Sandipan Bhumre) यांनी शिवसेना आणि विरोधी पक्षनेते अंबादास दानवे यांच्यावर जोरदार टीका केली होती. तर दुसरीकडे अंबादास दानवे यांनी देखील शिंदे गटावर निशाणा साधला होता. मात्र त्यानंतर हे दोन्ही नेते एकाच विमानातून मुंबईला रवाना झाले आहेत.
भुमरे, दानवेंचा एकाच विमानाने प्रवास
अंबादास दानवे आणि संदीपान भुमरे हे एकाच विमानाने दसरा मेळाव्यासाठी मुंबईला रवाना झाल्याचं पहायला मिळत आहे. त्यापूर्वी या दोन्ही नेत्यांनी एकोंमेकांवर घणाघाती टीका केली होती. मात्र त्यानंतर एकाच विमानाने प्रवास केला.
काय म्हटलं भुमरे यांनी?
संदीपान भुमरे यांनी विरोधी पक्षनेते अंबादास दानवे आणि शिवसेनेवर जोरदार टीका केली आहे. उद्धव ठाकरेंकडे आता फक्त गद्दार आणि नमक हराम हे दोनच शद्ब शिल्लक असल्याचं भुमरे यांनी म्हटलं होतं. आमच्या विरोधात भुंकण्यासाठी अंबादास दानवेंना पद दिल्याची टीकाही भुमरे यांनी केली.
अंबादास दानवेंचा शिंदे गटाला टोला
तर दुसरीकडे अंबादास दानवे यांनी देखील दसरा मेळाव्यावरून शिंदे गटावर घाणाघाती प्रहार केला आहे. शिंदे गटाचा मेळावा म्हणजे मोदींच्या ताटाखालचे मांजर असल्याची टीका त्यांनी केली आहे.
