तुकाराम मुंढेंच्या बदलीसाठी 250 कोटी रूपये तयार, इंटरनॅशनल ड्रग लॅाबीचा उल्लेख करत जितेंद्र आव्हाडांचा खळबळजनक दावा
Tukaram Mundhe : अन्न व औषध प्रशासनाचे आयुक्त म्हणून जबाबदारी स्वीकारल्यापासून तुकाराम मुंढे यांच्या पथकाने अनेक ठिकाणी धाड टाकत भेसळयुक्त पदार्थ जप्त करत संबंधित व्यक्तींवर कठोर कारवाई केलेली आहे. आता त्यांच्या बदलीबाबत मोठी बातमी समोर आली आहे.
तुकाराम मुंढे यांची महाराष्ट्रातील एक धडाकेबाज अधिकारी म्हणून ओळख आहे. ते सध्या अन्न व औषध प्रशासनाचे आयुक्त म्हणून काम पाहत आहेत. या पदाची जबाबदारी स्वीकारल्यापासून तुकाराम मुंढे यांच्या पथकाने अनेक ठिकाणी धाड टाकत भेसळयुक्त पदार्थ जप्त करत संबंधित व्यक्तींवर कठोर कारवाई केलेली आहे. तसेच तुकाराम मुंढे या विभागात आल्यापासून ड्रग्स माफियांचे धाबे दणाणले आहेत. अशातच आता तुकाराम मुंढे यांच्या बदलीची चर्चा सुरू झाली आहे. याबाबत आमदार जितेंद्र आव्हाड यांनी खळबळजनक दावा केला आहे. त्यांनी नेमकं काय म्हटलं ते जाणून घेऊयात.
तुकाराम मुंढेंच्या बदलीसाठी 250 कोटी…
राष्ट्रवादी शरदचंद्र पवार पक्षाचे आमदार जितेंद्र आव्हाड यांनी म्हटले की, FDA चे आयुक्त तुकाराम मुंढे यांच्या बदलीसाठी इंटरनॅशनल ड्रग लॅाबीकडून 250 कोटी रूपये गोळा करण्यात आले आहेत. ड्रग्ज लॉबी, मेडिकल कंपन्या असे अनेकजण एकत्र येऊन तुकाराम मुंढे यांच्या पाठीमागे लागलेले आहेत. पुढच्या आठवड्यात मी नावानिशी सगळं समोर आणणार आहे असं आव्हाड यांनी म्हटले आहे. तसेच अन्न व औषध प्रशासन हे खातं नरहरी झिरवाळ नव्हे तर इतर कोणीतरी चालवत असल्याचेही आव्हाड यांनी म्हटलं आहे.
तुकाराम मुंढे यांच्या बदलीचा प्रश्नच नाही…
या संपूर्ण प्रकरणावर बोलताना अन्न व औषध प्रशासन मंत्री नरहरी झिरवाळ यांनी, एफडीएकडून चांगली कारवाई सध्या सुरू आहे, त्यामुळे आयुक्त तुकाराम मुंडे यांच्या बदलीचा प्रश्नच येत नाही. अधिकाऱ्यांना गाड्या नाहीत, कार्यालय नाहीत. अत्यंत दयनीय अवस्था आहे. गाड्यांची व्यवस्था केली जाईल अशी माहिती दिली आहे. त्यामुळे आता आगामी काळात हा विभाग आणखी आक्रमकपणे काम करण्याची आशा आहे.
तुकाराम मुंढे यांना संरक्षण द्या…
दुसरीकडे आमदार सुधीर मुनगंटीवार यांनी या प्रकरणावर भाष्य करताना म्हटले की, तुकाराम मुंढे यांच्यातील टी हा टायगरमधील टी झाला आहे. ते चांगले काम करतायत, त्यांना तीन वर्षे पदावर ठेवले पाहिजे. तर अर्जुन खोतकर यांनी तुकाराम मुंडे यांना जीवे मारण्याच्या धमक्या येत आहेत. त्यांच्या जीवाला धोका आहे, त्यांना संरक्षण देण्यात यावे अशी मागणी केली आहे.
