Rakshabandhan 2026 : रक्षाबंधनाच्या दिवशीच चंद्रग्रहण, बहिणीने भावाला राखी कधी बांधावी, शुभ मुहूर्त काय?

रक्षाबंधन सणाला अवघे काही दिवस बाकी आहेत. या वर्षी 28 ऑगस्ट रोजी रक्षाबंधन सण साजरा केला जाणार आहे. त्याची तयारी आतापासूनच सुरू झाली आहे. परंतु याच रक्षाबंधनाच्या दिवशी चंद्र ग्रहण असणार आहे. म्हणूनच या वर्षाचे रक्षाबंधन अगदी विशेष ठरणार आहे. चंद्रग्रहण असल्याने बहिणींनी आपल्या भावाला राखी कधी बांधायची? सुतक काळ पाळायचा की नाही? तसेच नेमके कोणते नियम पाळावेत? असे अनेक प्रश्न विचारले जात आहेत.

रक्षाबंधनाच्या दिवशी चंद्रग्रहण

चंद्रग्रहणाच्या दिवशीच रक्षाबंधन ही एक खूपच अभूतपूर्व अशी घटना आहे. यंदाचे म्हणजेच 2026 सालचे चंद्रग्रहण 28 ऑगस्ट रोजी सकाळी सहा वाजून 55 मिनिटांनी सुरू होईल. त्यानंतर हे चंद्रग्रहण 12 वाजून 30 मिनिटांपर्यंत असेल. एकूण 5 तास 35 मिनिटे हे चंद्रग्रहण असेल.

भारतात चंद्रग्रहण दिसेल का?

येत्या 28 ऑगस्ट रोजी चंद्रग्रहण असेल. परंतु हे चंद्रग्रहण भारतात दिसणार का? असे विचारले जात आहे. या प्रश्नाचे उत्तर नाही असे आहे. भारतातील कोणत्याच भागातून हे चंद्रग्रहण दिसणार नाही. धर्मशास्त्रानुसार जे चंद्रग्रहण डोळ्यांना दिसत नाही, त्याचा दृश्य प्रभाव त्या भागावर नसतो. त्यामुळेच ज्या भागात चंद्रग्रहण दिसत नाही तिथे कोणतेही धार्मिक नियम लागू होत नाहीत. भारतात चंद्रग्रहण दिसणार नसल्याने देशात कुठेही चंद्रग्रहणाचे धार्मिक नियम लागू नसतील.

शुभ मुहूर्तावर काय परिणाम पडणार?

भारतात चंद्रग्रहण न दिसणे ही एक चांगली बाब आहे. त्यामुळे भारतात कोणतेही धार्मिक नियम पाळावे लागणार नाहीत. बहिणी आपल्या भावाला मुहूर्तावर राखी बांधू शकतात. चंद्रग्रहणाचा रक्षाबंधनाच्या शुभ मुहूर्तावर कोणताही परिणाम पडणार नाही. सोबतच सुतक काळ पाळण्याचीही गरज नसेल.

रक्षाबंधनाचा शुभ मूहर्त कोणता?

दरम्यान, पंचांगानुसार बहिणीने भावाला राखी बांधायची असेल तर त्यासाठी शुभ मुहूर्त हा सकाळी 6 वाजून 10 मिनिटांनी सुरू होईल. हा शुभ मुहूर्त नंतर सकाळी 9 वाजून 48 मिनिटांपर्यंत असेल. म्हणजेच राखी बांधण्यासाठी एकूण 3 तास 37 मिनिटांचा शुभ मुहूर्त असेल.