अभिषेक शर्मा षटकारांचा बादशाह बनला! धावांमध्येही खास टप्पा गाठला; ‘अशी’ कामगिरी करणारा तो सातवा भारतीय ठरला

टी-२० क्रिकेटमध्ये मोठे षटकार मारणे हे अभिषेक शर्माच्या फलंदाजीचे वैशिष्ट्य बनले आहे. २०२६ मध्येही त्याची बॅट चांगली कामगिरी करत आहे. यामुळेच अभिषेकने यावर्षी टी-२० आंतरराष्ट्रीय सामन्यांमध्ये षटकारांच्या बाबतीत इतर सर्व फलंदाजांना मागे टाकले आहे. त्याने आतापर्यंत ६२ षटकार मारले आहेत. तसेच अभिषेक शर्माने मायदेशात टी-२० आंतरराष्ट्रीय सामन्यांमध्ये १,००० धावा पूर्ण करणारा सातवा भारतीय खेळाडू बनून एक मोठा टप्पा गाठला आहे. यासह टी-२० आंतरराष्ट्रीय सामन्यांमध्ये सातत्याने उत्कृष्ट कामगिरी करणाऱ्या अभिषेक शर्माने आता एका विशेष क्लबमध्ये प्रवेश केला आहे.

सध्याच्या आकडेवारीनुसार, २०२६ मध्ये टी-२० आंतरराष्ट्रीय सामन्यांमध्ये सर्वाधिक षटकार मारणारा फलंदाज अभिषेक शर्मा आहे. त्याने आतापर्यंत ६२ षटकार मारले आहेत. या बाबतीत तो इतर फलंदाजांपेक्षा खूप पुढे आहे. अभिषेकची फलंदाजीची शैली नेहमीच आक्रमक राहिली आहे. तो डावाच्या सुरुवातीलाच मोठे फटके खेळण्याचा प्रयत्न करतो आणि चेंडू त्याच्या टप्प्यात येताच त्याला सीमारेषेबाहेर मारण्याचा त्याचा निर्धार असतो. या वर्षी त्याने मारलेल्या षटकारांची संख्याही त्याच्या याच आक्रमक दृष्टिकोनाची साक्ष देते.

भारतीय फलंदाज इशान किशनच्या नावावरही ४९ षटकार आहेत. इशान टी-२० क्रिकेटमधील जलद धावा आणि मोठ्या फटक्यांसाठीही ओळखला जातो. मात्र, यावर्षी अभिषेकने षटकारांच्या बाबतीत त्याला मागे टाकले आहे. वेस्ट इंडिजच्या शिमरॉन हेटमायरच्या नावावर ४४ षटकार आहेत. २०२६ मध्ये सर्वाधिक षटकार मारणाऱ्या फलंदाजांमध्येही त्याचा समावेश आहे, पण तो अभिषेकच्या ६२ षटकारांच्या मागे आहे.

तर दुसरीकडे टी२० आंतरराष्ट्रीय पदार्पणापासून, अभिषेक शर्माने मायदेशात आणि परदेशात विक्रमी खेळी करत सलामीवीर म्हणून आपले स्थान पक्के केले आहे. टी२० आंतरराष्ट्रीय सामन्यांमध्ये २००० धावा पूर्ण करण्याच्या जवळ असलेल्या शर्माने मायदेशात केवळ २९ सामन्यांमध्ये ३६.०७ च्या सरासरीने १०१० धावा जमवल्या आहेत. या काळात त्याने दोन शतके आणि सहा अर्धशतके झळकावली आहेत. सध्या भारतीय संघासाठी टी२० आंतरराष्ट्रीय सामन्यांमध्ये सर्वाधिक धावा करण्याचा विक्रम विराट कोहलीच्या नावावर आहे. त्याने मायदेशात ४६ टी२० सामने खेळून ५०.८७ च्या सरासरीने १५७७ धावा केल्या आहेत.