ऑस्ट्रेलियन क्रिकेटपटूला तुरूंगास भोगावा लागणार! गंभीर गुन्ह्यात दोषी असल्याचं सिद्ध

ऑस्ट्रेलियन गोलंदाजीचं भविष्य म्हणून एक काळ असा होता की एरॉन समर्सकडे पाहिलं जात होतं. पण एरॉन समर्सचं करिअर आता पूर्णपणे संकटात सापडलं आहे. क्रिकेटच्या मैदानात फलंदाजांना आपल्या वेगवान माऱ्याने घाबरवणारा गोलंदाज आता एका गंभीर गुन्ह्यात अडकला आहे. त्याने अल्पवयीन मुलीवर लैंगिक अत्याचार केल्याचा गंभीर गुन्हा कबूल केला आहे. त्यामुळे त्याला दीर्घकालीन तुरूंगवासाची शिक्षा होऊ शकते. टास्मानियाचं सर्वोच्च न्यायालय या प्रकरणाचा अंतिम निकाल ऑगस्टमध्ये देणार आहे. न्यायालयीन कागदपत्रांनुसार, हे प्रकरण 2018 आहे. जेव्हा एरॉन समर्स होबार्ट हरिकेन्स संघाचा सदस्य होता. त्याने सोशल मीडियाद्वारे एका अल्पवयीन पीडितेशी संपर्क साधला आणि तिच्यावर लैंगिक अत्याचार केले. त्यानंतर हे प्रकरण पोलिसात गेलं आणि खटला सुरू झाला. आठ वर्षांनी म्हणजेच जून महिन्याच्या अखेरिस त्याने या प्रकरणातील तीन गंभीर गुन्ह्यांची कबुली दिली.

काय म्हणाले एरॉन समर्सचे वकील?

एरॉन समर्स याचे वकील कॅरोलन ग्रेव्ह्स यांनी न्यायालयात सांगितलं की, घटनेच्या वेळी त्यांचा पक्षकार एका अत्यंत कठीण मानसिकतेतून जात होता. सामाजिकदृष्ट्या एकाकी पडला होता. त्याचा बहुतांश वेळ तो सोशल मीडियावर घालवत होता. सदर प्रकार त्याच्या मनातून कधीच जाणार नाही. पण त्याला पुढे जाण्याची संधी मिळायला हवी. ऑस्ट्रेलियामध्ये किंवा जगात इतरत्र कुठेही व्यावसायिक क्रिकेट खेळण्याचे त्याचे स्वप्न आता कायमचे संपले आहे, हे त्याला माहीत आहे.

समर्सचा हा काही पहिला गुन्हा नाही. 2021 मध्ये लैंगिक शोषणाचे चित्रण करणारी सामग्री बाळगल्याच्या आणि प्रसारित केल्याच्या एका वेगळ्या प्रकरणात त्याने आपला गुन्हा कबूल केला होता. त्यात त्याला तुरूंगवासाची शिक्षा सुनावण्यात आली होती. म्हणजेच यापूर्वीही अशाच गुन्ह्यात दोषी ठरला होता. त्यामुळे त्याला कठोर शिक्षा होणार यात काही शंका नाही. न्यायाधीश हेलन वूड यांनी स्पष्ट केलं की, या प्रकरणात कोणताही दिलासा शक्य नाही. त्याचा जामीनही न्यायालयाने रद्द केला. तसेच त्याला न्यायालयीन कोठडीत पाठवलं आहे.

30 वर्षीय एरॉन समर्सने देशांतर्गत क्रिकेटमध्ये बिग बॅश लीगमध्ये होबार्ट हरिकेन्स आणि टास्मानियाचे प्रतिनिधित्व केले आहे. समर्सने सात लिस्ट ए सामने आणि तीन टी20 सामने खेळले आहेत. लिस्ट ए सामन्यांमध्ये समर्सने 77 च्या सरासरीने पाच बळी घेतले आहेत. पण टी20 क्रिकेटमध्ये क्रिकेटमध्ये त्याला एकही बळी मिळालेला नाही. समर्स पीएसएल 2019 मध्ये कराची किंग्सकडून खेळला होता.