IPL 2026 : खेळपट्ट्यांबाबत बीसीसीआयचा मोठा निर्णय, आता असं करता येणार नाही

आयपीएल 2026 स्पर्धेची पूर्वतयारी झाली असून पहिल्या टप्प्याचं वेळापत्रक जाहीर करण्यात आलं आहे. 28 मार्चपासून 12 एप्रिलपर्यंत 20 सामन्यांचं वेळापत्रक समोर आलं आहे. चार राज्यांमधील निवडणुकांच्या तारखा अजूनही जाहीर न झाल्याने बीसीसीआयने पहिल्या टप्प्याचं वेळापत्रक जाहीर केलं आहे. दुसरीकडे दहाही संघ आता तयारीला लागले आहेत. असं असताना या स्पर्धेपूर्वी बीसीसीआयने संघांच्या सरावाबाबत मार्गदर्शक सूचना जारी केल्या आहेत. या सूचनेनुसार, संघाला एका संघाने सराव केलेल्या खेळपट्टीवर सराव करता येणार नाही. जर एका संघाने सराव एका खेळपट्टीवर केला असेल, तर दुसऱ्या संघाला दुसऱ्या खेळपट्टीचा वापर करावा लागणार आहे. यासाठी बीसीसीआयने सूचना दिल्या आहेत. बीसीसीआयच्या मार्गदर्शक सूचनेनुसार, प्रत्येक संघाला सरावासाठी नवी खेळपट्टी दिली जाईल.

दोन्ही संघांचा एकत्र सराव शिबीर असल्यास किंवा एक संघ दुसऱ्या संघानंतर सराव करणार असेल तेव्हाही एकच खेळपट्टी वापरता येणार नाही. यात थ्रो डाउनचा देखील समावेश आहे. जर एखाद्या संघाने लवकर सराव संपवला तरीही दुसऱ्या संघाला त्यांची खेळपट्टी वापरता येणार नाही. इतकंच काय तर कोणताही संघ मुख्य मैदानावर सराव सामने खेळणार नाही. नव्या पर्वासाठी खेळपट्ट्या तयार करण्याचं काम सुरू आहे. त्यामुळे मुख्य मैदानावर सराव सत्र किंवा सराव सामने खेळण्याची परवानगी नाही. जर एखाद्या घरच्या फ्रेंचायझीला सराव सामने खेळायचे असतील तर स्टेट क्रिकेट असोसिएशनकडे दुसऱ्या सराव मैदानाची मागणी करू शकतात.

बीसीसीआयने फ्लडलाइट्स सराव सामन्याबाबतही सूचना दिली आहे. सराव सामन्याचा कालावधी साडेतीन तासांपेक्षा अधिक नसावा. इतकंच काय तर संघांना जास्तीत जास्त दोन सराव सामने खेळण्याची परवानगी असणार आहे. पण यासाठीही फ्रेंचायझींना बीसीसीआयकडून परवानगी घ्यावी लागेल. इतकंच काय तर दोन्ही संघांच्या सराव सत्रांसाठी आवश्यक असलेल्या सर्व सुविधा पुरवण्याची जबाबदारी होम फ्रँचायझीकडे असेल. त्यामुळे आता फ्रेंचायझींना खेळपट्टीचा वापर करताना काळजी घ्यावी लागणार आहे. सराव शिबिरात काही वाद झाल्यास बीसीसीआय यात दखल घेईल.