IND vs NED: हाफ सेंच्युरी झळकवूनही Rohit Sharma खूश नाही, सांगितली मनातली गोष्ट
IND vs NED: रोहित शर्मा स्वत:च्याच खेळावर का खूश नाही?
सिडनी: टीम इंडियाने आज वर्ल्ड कपमधल्या दुसऱ्या सामन्यात नेदरलँडवर 56 धावांनी विजय मिळवला. याआधी मागच्या सामन्यात टीम इंडियाने पाकिस्तानवर मात केली होती. भारताचा कॅप्टन रोहित शर्मा आजच्या सामन्यात कॅप्टन इनिंग खेळला. त्याने 39 चेंडूत 53 धावा फटकावल्या. सिडनी क्रिकेट ग्राऊंडच्या मैदानावर गुरुवारी हा सामना झाला.
रोहित फार खूश नाही
रोहित शर्माने सलामीच्या पाकिस्तान विरुद्धच्या सामन्यात निराश केलं होतं. पण आजच्या नेदरलँड विरुद्धच्या सामन्यात रोहित शर्मा चांगल्या टचमध्ये दिसला. टीम इंडियाने 20 ओव्हर्समध्ये 2 बाद 179 धावा केल्या. सामन्यानंतर रोहितने हाफ सेंच्युरी झळकवण्यावर फार खूश नसल्याचं सांगितलं. पण केलेल्या धावा महत्त्वाच्या होत्या, हे त्यानं मान्य केलं.
शेवटी आत्मविश्वास असणं महत्त्वाच
“माझ्या फिफ्टीवर मी फार आनंदी नाहीय. पण धावा होणं जास्त महत्त्वाच आहे. मग त्या धावा चांगल्या वाटू दे किंवा खराब. दिवसाच्या शेवटी आत्मविश्वास असणं महत्त्वाच आहे” असे रोहित शर्मा म्हणाला.
प्रतिस्पर्ध्याची चिंता करत नाही
नेदरलँड विरुद्ध मिळवलेला विजय जवळपास परफेक्ट आहे, असं रोहित म्हणाला. “नेदरलँडची टीम सुपर 12 साठी पात्र ठरली, त्याचं श्रेय त्यांना जातं. आम्ही नेहमी स्वत: काय करु शकतो, याचा विचार करतो. प्रतिस्पर्ध्याची चिंता करत नाही. प्रामाणिकपणे सांगायच झाल्यास हा परफेक्शनच्या जवळ जाणारा विजय आहे” असं रोहित शर्मा म्हणाला.
आणखी दोघांनी अर्धशतकं झळकावली
टीम इंडियाकडून आजच्या मॅचमध्ये विराट कोहली, सूर्यकुमार यादव यांनी सुद्धा अर्धशतकं झळकावली. विराटने 44 चेंडूत नाबाद 62 आणि सूर्यकुमारने 25 चेंडूत नाबाद 51 धावा केल्या. टीम इंडियाने विजयासाठी 180 धावांच लक्ष्य दिलं होतं. नेदरलँडने 20 ओव्हर्समध्ये 9 बाद 123 धावा केल्या. टीम इंडियाने 56 धावांनी विजय मिळवला.
