Gautam Gambhir : अर्शदीप सिंह याच्याकडून एका ओव्हरमध्ये 7 Wide, गौतम गंभीरची सटकली, पाहा व्हीडिओ
Gautam Gambhir Angry Reactions On Arshdeep Singh Wide : अर्शदीप भारताचा यशस्वी टी 20i गोलंदाज आहे. मात्र अर्शदीपने एकाच ओव्हरमध्ये 7 वाईड बॉल टाकले. त्यामुळे गंभीर संतापला. पाहा व्हीडिओ.
टीम इंडियाचा टी 20i क्रिकेटमधील सर्वात यशस्वी वेगवान गोलंदाज अशी बिरुदावली मिरवणाऱ्या अर्शदीप सिंह याने दक्षिण आफ्रिकेविरुद्धच्या दुसऱ्या टी 20i सामन्यात निराशा केली आहे. अर्शदीप सिंह याने न्यू चंडीगड येथील मुल्लानपूरमधील महाराजा यादविंद्र सिंह आंतरराष्ट्रीय क्रिकेट स्टेडियममध्ये नकोशी कामगिरी करुन लाज घालवली. अर्शदीप सिंह याने एका ओव्हरमध्ये 6 नाही तर तब्बल 13 बॉल टाकले. कहर म्हणजे अर्शदीप याने एकाच ओव्हरमध्ये तब्बल 7 वाईड बॉल टाकले. त्यामुळे दक्षिण आफ्रिकेला काही न करता 7 धावा मिळाल्या. अर्शदीपला वाईड बॉल टाकताना पाहून डग आऊटमध्ये बसलेल्या हेड कोच गौतम गंभीरचा पारा चढला. सातत्याने वाईड बॉल टाकल्याने गंभीर संतापलेला दिसला. गंभीरच्या या गंभीर भावमुद्रेचा फोटो सोशल मीडियावर व्हायरल झाला आहे.
नक्की काय झालं?
अर्शदीप सिंह दक्षिण आफ्रिकेच्या डावातील 11 वी ओव्हर टाकायला आला. अर्शदीपने या ओव्हरमध्ये 13 बॉल टाकून 18 धावा दिल्या. क्विंटन डी कॉक याने अर्शदीपच्या ओव्हरमधील पहिल्याच बॉलवर खणखणीत सिक्स खेचला. त्यानंतर अर्शदीपने सलग 2 वाईड बॉल टाकले.
गौतम गंभीर संतापला
अर्शदीपने त्यानंतर कमॅबक करत तिसरा बॉल डॉट टाकला. मात्र अर्शदीपने त्यानंतर सलग 4 वाईड बॉल टाकले. दक्षिण आफ्रिकेचे यासह 100 धावा पूर्ण झाल्या. तसेच या दरम्यान गौतम गंभीर अर्शदीपच्या या अशा कामगिरीमुळे संतापला. अरे हा काय करतोय? गंभीर असंच काहीतरी बोलत असावा, असं त्याला पाहून वाटलं.
अर्शदीपने सलग 4 वाईडनंर 3 बॉल टाकले. आता ओव्हरमधील 1 बॉल बाकी होता. मात्र अर्शदीपने पुन्हा वाईड बॉल टाकला. अर्शदीपचा हा एका ओव्हरमधील सातवा वाईड बॉल टाकला. तर अर्शदीपने सहाव्या आणि शेवटच्या बॉलवर 1 धाव देत ओव्हर संपवली. अर्शदीपने अशाप्रकारे एका ओव्हरमध्ये 18 धावा दिल्या.
गौतम गंभीर संतापला
🚨Head Coach Gautam Gambhir’s ANGRY reactions on Arshdeep Singh’s wide.🤯
– Arshdeep give 17 runs in single over..!!🤯pic.twitter.com/BuQclbWgvU
— Sam (@Cricsam01) December 11, 2025
अर्शदीप सिंह याच्याकडून नवीन उल हक याच्या विक्रमाची बरोबरी
अर्शदीपने अशाप्रकारे टी 20i क्रिकेटमधील एका ओव्हरमध्ये सर्वाधिक 13 बॉल टाकण्याच्या विक्रमाची बरोबरी केली. अर्शदीपने अफगाणिस्तानच्या नवीन उल हक याच्या नकोशा विक्रमाची बरोबरी केली. नवीनने 2024 साली झिंबाब्वे विरुद्ध एका ओव्हरमध्ये 13 बॉल टाकले होते.
