IPL 2024 | मुंबई इंडियन्सचा विस्फोटक फंलदाज तिलक वर्मा ‘झटका’ देण्यासाठी तयार

मुंबई | क्रिकेट रणसंग्रमाला अर्थात आयपीएलच्या 17 व्या हंगामाला येत्या 22 मार्चपासून सुरुवात होणार आहे. लोकसभा निवडणुकांमुळे आयपीएलच्या या पर्वातील पहिल्याच टप्प्याचं वेळापत्रक जाहीर केलं आहे. पहिल्या टप्प्यात एकूण 10 संघ 21 सामने खेळणार आहेत. त्यापैकी मुंबई 4 मॅचेस खेळणार आहे. त्याआधी मुंबई इंडियन्ससाठी खेळणारा फलंदाज तिलक वर्मा आपल्या बॅटिंगने प्रतिस्पर्ध्यांना झटका द्यायला तयार झाला आहे. तिलक वर्माने 17 व्या सिजनआधी झंझावाती खेळी करत रणशिंग फुकलं आहे. इलेक्ट्रीशनचा मुलगा असलेला तिलक वर्मा याने नुकतंच डीवाय पाटील स्टेडियममध्ये सेंट्रल रेल्वे विरुद्ध झंझावाती खेळी केली होती. तिलकने 44 बॉलमध्ये 91 धावांची खेळी केली होती. तसेच 1 विकेटही घेतली होती. मुंबई इंडियन्सने तिलकच्या या कामिगिरीचा व्हीडिओ शेअर केला. त्यामुळे तिलककडून आयपीएलमध्ये अशाच झंझावाती खेळीची अपेक्षा असणार आहे.

तिलक वर्मा याची आयपीएल कारकीर्द

तिलक वर्मा याने 2022 साली मुंबई इंडियन्सकडून आयपीएल पदार्पण केलं. तिलकने विजय हजारे ट्रॉफी स्पर्धेच्या 2020-2021 हंगामात 2 शतकं ठोकत सर्वांच लक्ष वेधून घेतलं होतं. त्यानंतर मुंबई इंडियन्सने 1 कोटी 70 लाख रुपये मोजून तिलकला आपल्या ताफ्यात घेतलं. तिलक तेव्हापासून मुंबई इंडियन्समध्येच आहे. तिलकने मुंबईसाठी आयपीएलमध्ये केलेल्या कामगिरीच्या जोरावरच त्याला टीम इंडियात संधी मिळाली. दरम्यान तिलकने टीम इंडियाचं 4 एकदिवसीय आणि 16 टी 20 सामन्यांमध्ये प्रतिनिधित्व केलं आहे. तसेच 25 आयपीएल सामने खेळले आहेत. तिलकने वनडे आणि टी 20 मध्ये अनुक्रमे 68 आणि 336 धावा केल्या आहेत. तसेच आयपीएलमध्ये 740 धावा केल्या आहेत.  आता तिलक आगामी टी 20 वर्ल्ड कपच्या पार्श्वभूमीवर या 17 व्या पर्वात कशी कामगिरी  करतो, याकडे निवड समितीचंही लक्ष असणार आहे.

आयपीएल 2024 साठी मुंबई इंडियन्स | रोहित शर्मा, हार्दिक पंड्या (कॅप्टन), डेवाल्ड ब्रेविस, सूर्यकुमार यादव, ईशान किशन, तिलक वर्मा, टीम डेविड, विष्णु विनोद, शम्स मुलानी, नेहल वढेरा, जसप्रित बुमरा, कुमार कार्तिकेय, पीयूष चावला, आकाश मधवाल, जेसन बेहरेनडोर्फ, रोमारियो शेफर्ड, अर्जुन तेंडूलकर, गेराल्ड कोएत्झी, दिलशान मदुशंका, श्रेयस गोपाल, नुवान तुषारा, नमन धीर, अंशुल कंबोज, मोहम्मद नबी आणि शिवालिक शर्मा.