IND vs WI: …आणि मैदानातच केएल राहुल सूर्यकुमारवर झाला नाराज, पाहा VIDEO

अहमदाबाद: वेस्ट इंडिज विरुद्धच्या दुसऱ्या वनडे सामन्यात (India vs West indies 2nd odi) चौथ्या क्रमांकावर फलंदाजीला आलेल्या केएल राहुलने शानदार फलंदाजी केली. अवघ्या एका रन्सने त्याचं अर्धशतक हुकलं. संघाचा डाव अडचणीत असताना, केएल राहुल (KL Rahul) फलंदाजीसाठी मैदानावर आला होता. त्याने सूर्यकुमार यादवसोबत (Suryakumar yadav) मिळून चौथ्या विकेटसाठी 90 धावांची भागादारी केली. 48 चेंडूत 49 धावा करताना त्याने चार चौकार आणि दोन षटकार लगावले. संघाची धावसंख्या तीन बाद 43 असताना केएल राहुल फलंदाजीसाठी मैदानात आला होता. त्याने कुठलाही दबाव न घेता धावफलक हलता राहील याची काळजी घेतली. त्यामुळे सूर्यकुमार यादवला सुद्धा सहज फलंदाजी करता आली. ही जोडी भारताला तारेल असे वाटत असतानाच, राहुल धावबाद झाला. सूर्यकुमार आणि राहुल मध्ये धाव घेताना गोंधळ उडाला आणि राहुल धावबाद झाला. त्याच्यामते ही धाव घेताना सूर्यकुमारने चूक केली. त्यामुळे रनआऊट झाल्यानंतर त्याने सूर्यकुमारवर आपली नाराजी व्यक्त केली.

राहुल रनआऊट झाला. पण याच सामन्यातलं आणखी एक वैशिष्ट्य म्हणजे तब्बल 16 वर्षानंतर भारतीय फलंदाज 49 धावांवर रनआऊट झाला. केएल राहुलच्या आधी 2006 मध्ये भारताचे हेड कोच राहुल द्रविड 49 धावांवर खेळताना रनआऊट झाले होते. अजब योगायोग म्हणजे राहुल द्रविड सुद्धा अहमदाबादमध्येच वेस्ट इंडिज विरुद्ध रनआऊट झाले होते. राहुलचं रनआऊट होणं, भारताला महाग पडलं. कारण राहुल चांगल्या फॉर्ममध्ये दिसत होता. राहुल बाद झाल्यानंतर तशी दुसरी मोठी भागीदारी होऊ शकली नाही.

सूर्यकुमार यादवने अर्धशतक झळकावलं. तो 64 धावांवर बाद झाला. अहमदाबादच्या या पीचवर वेगवान गोलंदाजांना सुरुवातीला मदत मिळाली. त्यामुळे भारताचे आघाडीचे फलंदाज लवकर माघारी परतले.

KL Rahul Run Out ?#INDvWI #KLRahul #ViratKholi pic.twitter.com/qcwkQohdko

— Saqlain Khan (@Saqlainejaz56) February 9, 2022

पहिल्या सामन्यात भारताने वेस्ट इंडिजची जी हालत केली होती, दुसऱ्या वनडेत वेस्ट इंडिजनेही तशीच सुरुवात केली. ओडियन स्मिथने यात महत्त्वाची भूमिका बजावली. टीम इंडियाने आज ऋषभ पंतला सलामीला आणून सर्वांनाच धक्का दिला. पण हा प्रयोग यशस्वी ठरला नाही. कारण ओडियन स्मिथने पंतला माघारी धाडलं.

kl rahul run out on 49 reminds rahul dravid suryakumar yadav watch video india vs west indies 2nd odi