Cricket : वर्ल्ड कप फायनलनंतर आता टी 20I मालिकेचा थरार, टीम सज्ज, पहिला सामना कधी?
T20i Series 2026 : आयसीसी टी 20i वर्ल्ड कप 2026 स्पर्धेच्या अंतिम फेरीतील सामन्यात टीम इंडियाने न्यूझीालंडला पराभूत केलं होतं. आता उपविजेता न्यूझीलंड मायदेशात 5 सामन्यांची टी 20i मालिका खेळणार आहे.
न्यूझीलंड क्रिकेट टीम जानेवारी महिन्यात भारत दौऱ्यावर आली होती. न्यूझीलंडने भारताचा वनडे सीरिजमध्ये 2-1 ने पराभव केला. त्यानंतर भारताने न्यूझीलंडला टी 20i सीरिजमध्ये 4-1 ने पराभूत केलं. या द्विपक्षीय मालिकेनंतर भारत विरुद्ध न्यूझीलंड दोन्ही संघ टी 20i वर्ल्ड कप 2026 स्पर्धेच्या अंतिम फेरीत आमनेसामने आले. मात्र भारताने न्यूझीलंडचा अहमदाबादमधील नरेंद्र मोदी स्टेडियममध्ये पराभव केला. त्यामुळे न्यूझीलंडचं वर्ल्ड कप जिंकण्याचं स्वप्न यंदाही अधुर राहिलं. टीम इंडिया विश्वविजेता ठरली. तर न्यूझीलंडला उपविजेता म्हणून मायदेशी परतावं लागंल आहे.
न्यूझीलंड मायदेशीत परतताच आता 15 मार्चपासून दक्षिण आफ्रिकेविरुद्ध खेळणार आहे. न्यूझीलंड विरुद्ध दक्षिण आफ्रिका यांच्यात 5 सामन्यांची टी 20i मालिका खेळवण्यात येणार आहे. हा सामना रविवारी 15 मार्चला होणार आहे. या निमित्ताने दक्षिण आफ्रिका विरुद्ध न्यूझीलंड टी 20i वर्ल्ड कप 2026 सेमी फायनलनंतर आमनेसामने येणार आहेत. न्यूझीलंडने दक्षिण आफ्रिकेला उपांत्य फेरीतील सामन्यात पराभूत केलं होतं. त्यामुळे दक्षिण आफ्रिकेचा या मालिकेत न्यूझीलंडला त्यांच्याच घरात पराभूत करण्याचा प्रयत्न असणार आहे.
दक्षिण आफ्रिकेचा न्यूझीलंड दौरा 2026
न्यूझीलंड विरुद्ध दक्षिण आफ्रिका यांच्यात 15 मार्चपासून टी 20i मालिकेला सुरुवात होईल. तर 25 मार्चला पाचव्या आणि अंतिम सामन्याने या मालिकेची सांगता होईल. एडन मारक्रम या मालिकेत दक्षिण आफ्रिकेचं नेतृत्व करणार आहे. तर न्यूझीलंड टीम मॅनेजमेंटने या मालिकेसाठी 2 कर्णधारांची नियुक्ती केली आहे. न्यूझीलंडचं पहिल्या 3 सामन्यांमध्ये नियमित कर्णधार मिचेल सँटनर नेतृत्व करणार आहे. तर शेवटच्या 2 सामन्यांमध्ये टॉम लॅथम याच्या खांद्यावर न्यूझीलंडच्या कर्णधारपदाची धुरा असणार आहे.
टी 20i मालिकेचं वेळापत्रक
पहिला सामना, 15 मार्च.
दुसरा सामना, 17 मार्च.
तिसरा सामना, 20 मार्च.
चौथा सामना, 22 मार्च.
पाचवा सामना, 25 मार्च.
न्यूझीलंडने 8 मार्च रोजी टीम इंडिया विरुद्ध आयसीसी टी 20i वर्ल्ड कप स्पर्धेतील अंतिम सामना खेळला. त्यानंतर अवघ्या काही दिवसांनी दक्षिण आफ्रिकेविरुद्ध ही मालिका होत आहे. त्यामुळे टीम मॅनेजमेंटने वर्कलोडचा विचार करता काही खेळाडूंना विश्रांती दिली आहे. त्यामुळे यजमान न्यूझीलंड क्रिकेट टीम दक्षिण आफ्रिकेविरुद्ध या टी 20i मालिकेत कशी कामगिरी करते हे पाहणं महत्त्वाचं ठरणार आहे.
