IPL 2026: आयपीएल 2026 स्पर्धेपूर्वी रवींद्र जडेजाचं वादळ घोंघावलं, 250 च्या स्ट्राईक रेटने ठोकल्या धावा
आयपीएल 2026 स्पर्धेपूर्वी बऱ्याच उलथापालथी झाल्या. त्यात एक उलथापालथ म्हणजे रवींद्र जडेजा आणि संजू सॅमसन यांच्यातील ट्रेड डील.. दोन्ही खेळाडूंची आदलाबदल करण्यात आली. असं असताना रवींद्र जडेजाने आपला आक्रमक बाणा दाखवला आहे.
आयपीएल 2026 स्पर्धेला आता काही तासात सुरूवात होईल. या स्पर्धेत सर्वच दहा फ्रेंचायझींनी आपल्या संघाची बांधणी केली आहे. पण या स्पर्धेपूर्वी झालेल्या एका ट्रेड डीलने सर्वांचं लक्ष वेधून घेतलं. चेन्नई सुपर किंग्स आणि राजस्थान रॉयल्स यांच्यात ही डील झाली होती. संजू सॅमसन आणि रवींद्र जडेजा यांच्यात अदलाबदल झाली होती. राजस्थान रॉयल्सने पुन्हा एकदा रवींद्र जडेजाला आपल्या संघात घेतलं आहे. रवींद्र जडेजा हा आयपीएल 2008 विजेत्या संघाचा भाग होता. त्यामुळे त्याच्याकडून पुन्हा एकदा तशाच कामगिरीची अपेक्षा आहे. मधल्या काळात पुलाखालून बरंच पाणी वाहून गेलं आहे. रवींद्र जडेजाचा अनुभवही दांडगा आहे. त्यामुळे त्याचा फायदा राजस्थान रॉयल्स असं वाटत आहे. त्याची एक झलक रवींद्र जडेजाने सराव सामन्यात दाखवून दिली आहे. त्याची फलंदाजी पाहून राजस्थान रॉयल्स आणि त्याचे चाहते खूश झाले आहेत.
राजस्थान रॉयल्सचा स्टार अष्टपैलू खेळाडू रवींद्र जडेजाने सराव सामन्यात जुरेल 11 विरुद्ध जबरदस्त फलंदाजी केली. त्याने 34 चेंडूत नाबाद 95 धावा ठोकल्या. यावेळी रवींद्र जडेजाने सर्वच गोलंदाजांची पिसं काढली. चौकार षटकारांचा वर्षाव केला. इतकंच काय तर फलंदाजीसोबत गोलंदाजीतही तितकी ताकद दाखवून दिली. त्याने या सामन्यात 4 विकेट काढल्या. रवींद्र जडेजाची ही खेळी पाहून त्याचा फॉर्म काय आहे याचा अंदाज क्रीडाप्रेमींनी बांधला आहे.
आयपीएल 2026 स्पर्धेत राजस्थान रॉयल्सचा पहिला सामना चेन्नई सुपर किंग्सशी होणार आहे. मागच्या पर्वात याच संघातून रवींद्र जडेजा खेळला आहे. गेली अनेक वर्षे तो चेन्नई सुपर किंग्सचा भाग होता. जेतेपद मिळवून देण्यात त्याने मोलाचा हातभारही लावला आहे. त्यामुळे रवींद्र जडेजाचा हा फॉर्म पाहून धडकी भरणार हे नक्की आहे. 30 मार्चला राजस्थान रॉयल्स आणि चेन्नई सुपर किंग्स भिडणार आहेत. रवींद्र जडेजाने आतापर्यंत आयपीएल करिअरमध्ये 3260 धावा आणि 170 विकेट काढल्या आहेत.
