RCB vs CSK Live Streaming : चेन्नईसमोर पराभवाची हॅट्रिक टाळण्याचं आव्हान, आरसीबी सलग दुसऱ्या विजयासाठी तयार, कोण मिळवणार 2 गुण?
Royal Challengers Bengaluru vs Chennai Super Kings IPL 2026 Live Scorecard: चेन्नई 19 व्या मोसमातील आपल्या पहिल्या 2 सामन्यात विजय मिळवण्यात अपयशी ठरली. त्यामुळे चेन्नईचा आता बंगळुरुसमोर 2 गुणांसाठी चांगलाच कस लागणार आहे.
चेन्नई सुपर किंग्स आयपीएल स्पर्धेतील दुसरी सर्वात यशस्वी टीम आहे. चेन्नईने मुंबई इंडियन्सनंतर 5 वेळा आयपीएल ट्रॉफी जिंकण्याची कामगिरी केली आहे. मात्र चेन्नई 19 व्या मोसमात (IPL 2026) दिग्गज अनुभवी खेळाडू महेंद्रसिंह धोनी याच्याशिवाय बेहाल असल्याचं चित्र आहे. चेन्नईला ऋतुराज गायकवाड याच्या नेतृत्वात दोन्ही सामन्यांमध्ये पराभूत व्हावं लागलं आहे. तर गतविजेता रॉयल चॅलेंजर्स बंगळुरुने या पर्वात विजयी सुरुवात केली आहे. रविवारी 5 एप्रिलला आरसीबी विरुद्ध सीएसके यांच्यात सामना होणार आहे. चेन्नईचा हा तिसरा तर आरसीबीचा दुसरा सामना असणार आहे. चेन्नईसमोर या सामन्यात पराभवाची हॅट्रिक टाळण्याचं आव्हान असणार आहे. तर आरसीबी सलग दुसरा सामना जिंकण्यासाठी मैदानात उतरणार आहे. त्यामुळे रविवारी होणाऱ्या सामन्यात कोण विजेता ठरतो याकडे क्रिकेट चाहत्यांचं लक्ष असणार आहे. आरसीबी-चेन्नई सामन्याची वेळ आणि इतर माहिती जाणून घेऊयात.
आरसीबी विरुद्ध सीएसके सामना कधी?
आरसीबी विरुद्ध सीएसके सामना रविवारी 5 एप्रिलला होणार आहे.
आरसीबी विरुद्ध सीएसके सामना कुठे?
आरसीबी विरुद्ध सीएसके सामना एम चिन्नास्वामी स्टेडियम, बंगळुरु इथे खेळवण्यात येणार आहे.
आरसीबी विरुद्ध सीएसके सामन्याला किती वाजता सुरुवात होणार?
आरसीबी विरुद्ध सीएसके सामन्याला संध्याकाळी साडे सात वाजता सुरुवात होणार आहे. तर 7 वाजता टॉस होईल.
आरसीबी विरुद्ध सीएसके हेड टु हेड रेकॉर्ड्स
बंगळुरु विरुद्ध चेन्नई यांच्यात आतापर्यंत एकूण 35 वेळा आमनासामना झाला आहे. चेन्नईने 35 पैकी सर्वात जास्त सामन्यांमध्ये विजय मिळवला आहे. चेन्नईने बंगळुरुला 21 सामन्यांत विजय मिळवला आहे. तर बंगळुरुने चेन्नईवर 13 वेळा मात केली आहे. तर उभयसंघातील एका सामन्याचा निकाल लागला नाही.
ऋतुराज कर्णधार म्हणून पहिल्या दोन्ही सामन्यात यलो आर्मीला विजयी करण्यात अपयशी ठरला. तसेच ऋतुराजला दोन्ही सामन्यात बॅटिंगने काही खास करता आलं नाही. त्यामुळे ऋतुराजसमोर कर्णधार आणि फलंदाज म्हणून आणखी भरीव कामगिरी करण्याचं दुहेरी आव्हान असणार आहे. तर दुसऱ्या बाजूला गतविजेत्या संघाचा कॅप्टन रजत पाटीदार याने त्याच्या नेतृत्वात 19 व्या पर्वातही आरसीबीला विजयी सुरुवात करुन दिली. त्यामुळे आरसीबाचा सलग दुसरा सामना जिंकणार का? याकडे चाहत्यांचं लक्ष असणार आहे.
