तो वादात होता, पण…! टेम्बा बावुमाने वर्ल्ड टेस्ट चॅम्पियनशिप जिंकल्यानंतर या खेळाडूंना दिलं श्रेय

वर्ल्ड टेस्ट चॅम्पियनशिप 2025 स्पर्धेच्या अंतिम फेरीत दक्षिण अफ्रिकेने ऑस्ट्रेलियाचा धुव्वा उडवला. सामन्याच्या चौथ्या दिवशी पाच गडी राखून ऑस्ट्रेलियाला पराभूत केलं. नाणेफेकीचा कौल गमवल्यानंतर ऑस्ट्रेलियाच्या वाटेला प्रथम फलंदाजी आली. ऑस्ट्रेलियाने पहिल्या डावात 212 धावांची खेळी केली. तर पहिल्या डावात दक्षिण अफ्रिकेला 138 धावांवर रोखलं. यामुळे ऑस्ट्रेलियाकडे 74 धावांची मजबूत आघाडी होती. त्यात दुसऱ्या डावात ऑस्ट्रेलियाच्या तळाच्या फलंदाजांनी चिवट खेळी केली आणि 207 धावांपर्यंत मजल मारली. त्यामुळे हा विजय काय दक्षिण अफ्रिकेला गाठता येणार नाही असंच वाटत होतं. लॉर्ड्सवर 282 धावांचं विजयी लक्ष्य गाठणं काही सोपं नव्हतं. पण दक्षिण अफ्रिकेने पाच गडी गमवून 282 धावा पूर्ण केल्या. या विजयात एडन मार्करम आणि कगिसो रबाडा यांची खेळी महत्त्वाची ठरली. पण सामनावीराचा पुरस्कार एडन मार्करम घेऊन गेला. दक्षिण अफ्रिकेने 27 वर्षानंतर आयसीसी ट्रॉफी जिंकली आहे. या आधी हँसी क्रोनिएच्या नेतृत्वात चॅम्पियन्स ट्रॉफी 1998 जिंकली होती. या विजयानंतर कर्णधार टेम्बा बावुमाने आनंद व्यक्त केला आहे.

दक्षिण अफ्रिकेचा कर्णधार टेम्बा बावुमा म्हणाला की, “गेले काही दिवस आमच्यासाठी खूप खास होते. आम्हाला असे वाटले की आम्ही दक्षिण आफ्रिकेत घरी परतलो आहोत, कारण या सामन्यादरम्यान आम्हाला खूप पाठिंबा मिळाला. एक संघ म्हणून आमच्यासाठी हा एक संस्मरणीय क्षण आहे. ते जाणवण्यासाठी आणखी काही दिवस लागतील. कागिसो रबाडा हा एक मोठा खेळाडू आहे, काही वर्षांत तो आयसीसी हॉल ऑफ फेमचा भाग देखील होईल. तो वादात होता, पण त्याने जे केलं ते तो करतो. मार्कराम अविश्वसनीय होता, आकडेवारी महत्त्वाची आहे, परंतु आम्हाला माहित होते की तो काय करू शकतो. मला खात्री आहे की घरी लोक उत्सव साजरा करत असतील.”

पहिल्या डावात दक्षिण अफ्रिकेच्या कगिसो रबाडाने 5 विकेट घेत कांगारूंना बॅकफूटवर ढकललं होतं. त्याने 15.4 षटकात 51 धावा देत पाच बळी टिपले होते. दुसरीकडे, पहिल्या डावात एडन मार्करम फेल गेला. त्याला आपलं खातंही खोलता आलं नाही. दुसऱ्या डावात कगिसो रबाडाने पुन्हा कमाल केली. 18 षटकात 59 धावा देत 4 गडी बाद केले. दरम्यान दुसऱ्या डावात एडन मार्करची बॅट चांगलीच तळपली. त्याने 207 चेंडूंचा सामना 136 धावा केल्या. यात 14 चौकारांचा समावेश होता. त्याच्या या खेळीमुळे दक्षिण अफ्रिकेला विजयाची चव चाखता आली.