2025 या वर्षात टीम इंडियाचं वनडे, टी20 आणि टेस्ट मालिकेचं कसं आहे वेळापत्रक, जाणून घ्या

टीम इंडियासाठी 2025 वर्ष स्थित्यंतराचं असणार आहे. या वर्षात टीम इंडियाची नव्याने बांधणी होणार आहे. कारण रोहित शर्मा आणि विराट कोहली हे निवृत्तीच्या उंबरठ्यावर उभे आहेत. त्यामुळे कसोटी आणि वनडे संघाची नव्याने बांधणी करावी लागणार आहे. खासकरून कर्णधारपदाची धुरा कोणाच्या खांद्यावर पडणार हे सर्वकाही ठरवावं लागणार आहे. चला जाणून घेऊयात 2025 वर्षात टीम इंडियाचं वेळापत्रक कसं आहे ते

Rakesh Thakur | Updated on: Dec 31, 2024 | 2:21 PM

टी20 वर्ल्डकप 2024 स्पर्धेनंतर रोहित शर्मा, विराट कोहली आणि रवींद्र जडेजा यांनी टी20 क्रिकेटमधून निवृत्ती जाहीर केली. आता तिघंही वनडे आणि कसोटी सामन्यात खेळतात. आता पुढच्या वर्षात रोहित आणि विराटच्या निवृत्तीचे वेध लागले आहेत. कदाचित भारतीय संघ वर्ल्ड टेस्ट चॅम्पियनशिपसाठी पात्र ठरला नाही. तर या दोघांसाठी ही बॉर्डर गावस्कर कसोटी मालिका शेवटची ठरू शकते. 2025 या वर्षात टीम इंडिया इंग्लंड, ऑस्ट्रेलिया, दक्षिण अफ्रिका, वेस्ट इंडिज, बांग्लादेश यांच्यासोबत मालिका खेळणार आहे. तर चॅम्पियन्स ट्रॉफी आणि आशिया कप स्पर्धा खेळणार आहे. चॅम्पियन्स ट्रॉफी वनडे फॉर्मेटमध्ये, तर आशिया कप टी20 फॉर्मेटमध्ये आहे. भारत विरुद्ध ऑस्ट्रेलिया यांच्यात बॉर्डर-गावस्कर ट्रॉफी मालिकेतील पाचवा कसोटी सामना 3 ते 7 जानेवारी दरम्यान (सिडनी) खेळला जाईल.

भारतीय संघ 2025 या वर्षात पाच वनडे मालिका खेळणार आहे. यात चॅम्पियन्स ट्रॉफीचा समावेश आहे. तर दोन मालिका घरच्या मैदानावर तर दोन विदेशात खेळणार आहे. इंग्लंडविरुद्ध 3 सामने (होम ग्राउंड), चॅम्पियन्स ट्रॉफी 2025 (दुबई), बांगलादेशविरुद्ध 3 सामने (भारताबाहेर), ऑस्ट्रेलियाविरुद्ध 3 सामने (भारताबाहेर), दक्षिण अफ्रिकेविरुद्ध 3 सामने (होमग्राउंड) असं वनडे मालिकेचं वेळापत्रक आहे.

भारत 2025 या वर्षात पाच टी20 मालिका खेळणार आहे. यात आशिया कप 2025 चा समावेश आहे. इंग्लंडविरुद्ध पाच सामन्यांची टी20 मालिका (होमग्राउंड), बांगलादेशविरुद्ध तीन सामन्यांची टी20 मालिका (भारताबाहेर), आशिया कप 2025, ऑस्ट्रेलियाविरुद्ध पाच सामन्यांची टी20 मालिका (भारताबाहेर), दक्षिण अफ्रिकेविरुद्ध पाच सामन्यांची टी20 मालिका (होमग्राउंड) असं वेळापत्रक आहे.

भारतीय संघ वर्ल्ड टेस्ट चॅम्पियनशिपच्या अंतिम फेरीत स्थान मिळवणार की नाही हे अजून पक्कं नाही. कदाचित टीम इंडियाच्या पदरी निराश पडेल असं दिसत आहे. 2025 वर्षात बॉर्डर गावस्कर कसोटी मालिकेतील शेवटचा सामना खेळणार आहे. त्यानंतर वर्ल्ड टेस्ट चॅम्पियनशिप अंतिम फेरी गाठली तर एक सामना खेळेल. इंग्लंडविरुद्ध पाच सामन्यांची कसोटी मालिका (भारताबाहेर), वेस्ट इंडिज विरुद्ध दोन सामन्यांची कसोटी मालिका (होमग्राउंड) आणि दक्षिण अफ्रिकेविरुद्ध दोन सामन्यांची कसोटी मालिका (होमग्राउंड) असं वेळापत्रक असेल.

टीम इंडियाकडून नववर्ष 2025 मधून फार अपेक्षा आहेत. खासकरून चॅम्पियन्स ट्रॉफी स्पर्धेत भारताने यश मिळवावं अशी क्रीडाप्रेमींची अपेक्षा आहे. कारण मागच्या पर्वात पाकिस्तानने भारताचा अंतिम फेरीत धु्व्वा उडवला होता. त्यामुळे विजयाचं स्वप्न भंगलं होतं.