आयपीएल स्पर्धेत क्वॉलिफायर 1, क्वॉलिफायर2 आणि एलिमिनेटर संघापैकी कोण सर्वाधिक चॅम्पियन? जाणून घ्या

आयपीएल 2026 स्पर्धेच्या अंतिम फेरीत रॉयल चॅलेंजर्स बंगळुरूने एन्ट्री मारली आहे. क्वॉलिफायर 1 सामन्यात गुजरात टायटन्सला पराभूत केलं आणि अंतिम फेरीत धडक मारली. तर एलिमिनिटेर फेरीत राजस्थान रॉयल्सने सनरायझर्स हैदराबादचा धुव्वा उडवला आणि क्वॉलिफायर 2 फेरीत एन्ट्री मारली आहे. आता क्वॉलिफायर 2 फेरीत राजस्थान रॉयल्स आणि गुजरात टायटन्स यांच्यात लढत होणार आहे. असं असताना आयपीएलच्या इतिहासात क्वॉलिफायर 1, क्वॉलिफायर 2 आणि एलिमिनेटर फेरीतील किती संघांनी जेतेपद पटकावलं आहे, असा प्रश्न आहे. आतापर्यंत 8 वेगवेगळ्या फ्रेंचायझींनी 18 पर्वात जेतेपद पटकावलं आहे. यात चेन्नई सुपर किंग्स आणि मुंबई इंडियन्सने प्रत्येकी 5 जेतेपदांवर नाव कोरलं आहे. केकेआरने तीनवेळा जेतपद पटकावलं आहे. तर राजस्थान रॉयल्स, डेक्कन चार्जर्स, सनरायझर्स हैदराबाद, गुजरात टायटन्स आणि रॉयल चॅलेंजर्सं बंगळुरू यांनी प्रत्येकी एकदा जेतेपदाला गवसणी घातली आहे. चला जाणून घेऊयात क्वॉलिफायर 1, क्वॉलिफायर 2 आणि एलिमिनेटर जेतेपदाची आकडेवारी

क्वॉलिफायर 1

क्वॉलिफायर 1 मध्ये विजयी झालेल्या संघाने आतापर्यंत 12 वेळा जेतेपदाला गवसणी घातली आहे. पाच संघांनी ही किमया केली आहे. चेन्नई सुपर किंग्सने 2011, 2018, 2021 आणि 2023 मध्ये जेतेपद मिळवलं आहे. त्यानंतर मुंबई इंडियन्सने 2015, 2019, 2020 मध्ये जेतेपद पटकावलं आहे. केकेआरने 2012, 2014, 2024 मध्ये जेतेपदाला गवसणी घातली आहे. तर गुजरात टायटन्सने 2022 आणि रॉयल चॅलेंजर्स बंगळुरूने 2025 मध्ये जेतेपद मिळवलं आहे. तर 2008, 2009 आणि 2019 मध्ये सेमी फायनल पॅटर्न होता. त्यामुळे त्याची गणना नाही.

क्वॉलिफायर 2

क्वॉलिफायर 1 मध्ये पराभूत झाल्यानंतर क्वॉलिफायर 2 मध्ये विजय मिळवून जेतेपद फक्त एका संघाने पटकावलं आहे. मुंबई इंडियन्सने ही कामगिरी 2013 आणि 2017 मध्ये केली आहे. क्वॉलिफायर 1 मध्ये पराभूत झाल्यानतंर मुंबई इंडियन्सने कमबॅक केलं आणि जेतेपदाला गवसणी घातली. 2013 मध्ये मुंबई इंडियन्सला क्वॉलिफायर 1 मध्ये चेन्नईने पराभूत केलं. त्यानंतर मुंबईने क्वॉलिफायर 2 मध्ये राजस्थान रॉयल्सला पराभूत केलं आणि अंतिम फेरी गाठली. चेन्नईला पराभूत करून जेतेपद पटकावलं. तर 2017 मध्ये क्वॉलिफायर 1 मध्ये पुणे रायझिंग सुपरजायंट्सकडून पराभव, क्वॉलिफायर 2 मध्ये केकेआरला नमवून अंतिम फेरी गाठली. अंतिम फेरीत मुंबईने पुण्याला पराभूत केलं आणि जेतेपद पटकावलं.

एलिमिनेटर

एलिमिनेटर फेरीत स्थान मिळवून जेतेपद पटकवण्याची किमया आयपीएल इतिहासात फक्त एकदाच घडली आहे. सनरायझर्स हैदराबादने ही किमया केली आहे. 2016 मध्ये एलिमिनेटर फेरीत कोलकाता नाईट रायडर्सला 22 धावांनी नमवलं. क्वॉलिफायर 2 मध्ये गुजरात लायचन्ला 4 विकेटने पराभूत केलं आणि अंतिम फेरीत रॉयल चॅलेंजर्स बंगळुरूला 8 धावांनी पराभूत केलं आणि जेतेपदावर नाव कोरलं. बाद फेरीत सलग तीन सामने जिंकून जेतेपद पटकावणारा सनरायझर्स हैदराबाद एकमेव संघ आहे.