आयपीएल 2026 स्पर्धेपूर्वी केकेआरला मुस्तफिझुर रहमानची रिप्लेसमेंट मिळाली, पीएसएलला ठेंगा
आयपीएल 2026 स्पर्धेचं बिगुल वाजलं असून 28 मार्चपासून स्पर्धेला सुरुवात होणार आहे. या स्पर्धेपूर्वी केकेआरला मुस्तफिझुर रहमानची जागा भरून काढायची होती. अखेर केकेआरला त्याची रिप्लेसमेंट मिळाली आहे.
आयपीएल 2026 स्पर्धेचं पहिल्या टप्प्यातील वेळापत्रक जाहीर झालं आहे. 28 मार्च ते 12 एप्रिल दरम्यान होणाऱ्या 20 सामन्यांचं वेळापत्रक समोर आलं आहे. या स्पर्धेसाठी सर्वच संघांची जोरदार तयारी सुरू आहे. असं असताना कोलकाता नाईट रायडर्स संघात एका खेळाडूची एन्ट्री झाली आहे. मुस्तफिझुर रहमानला संघातून बाहेर काढल्याने ही जागा रिक्त होती. अखेर कोलकात्याला त्याची जागा भरून काढण्यासाठी योग्य खेळाडू मिळाला आहे. झिम्बाब्वेचा वेगवान गोलंदाज ब्लेसिंग मुजरबानी आयपीएल 2026 स्पर्धेत केकेआरकडून मैदानात उतरणार आहे. कोलकाता नाईट रायडर्सने 13 मार्चला सोशल मीडियावरून याबाबत माहिती दिली आहे. आयपीएल स्पर्धा 28 मार्चपासून सुरू होणार आहे. ब्लेसिंग मुजरबानी 17 मार्चला केकेआरच्या सराव शिबिरात रूजू होणार आहे. त्याला किती रक्कम मिळाली हे मात्र माहिती नाही. पण त्याने पीएसएल 2026 स्पर्धेतून तात्काळ माघार घेतली.
आयपीएल 2026 स्पर्धेत केकेआरचा भाग होण्यापू्र्वी ब्लेसिंग पाकिस्तान सुपर लीग स्पर्धेत खेळणार होता. इस्लामाबाद युनाईटेड संघाने त्याला आपल्या संघात घेतलं होतं. पण आयपीएल स्पर्धेत केकेआरकडून ऑफर येताच त्याने पीएसएलला ठेंगा दाखवला आहे. सर्वात महत्त्वाची बाब म्हणजे, पीएसएल लिलावात ब्लेसिंग मुजरबानी अनसोल्ड राहिला होता. पण शमार जोसेफच्या ऐवजी त्याला रिप्लेसमेंट म्हणून इस्लामाबाद यूनाइटेडने संघात घेतलं होतं. ब्लेसिंग मुजरबानी दुसऱ्यांदा आयपीएल स्पर्धेत भाग घेणार आहे. यापूर्वी आयपीएल 2025 स्पर्धेत आरसीबी संघाचा भाग होता. आरसीबीने त्याला रिप्लेसमेंट म्हणूनच घेतलं होतं.
A new Blessing in Purple & Gold 💜🔥 pic.twitter.com/p31V3LsGfm
— KolkataKnightRiders (@KKRiders) March 13, 2026
ब्लेसिंग मुजरबानी याने टी20 वर्ल्डकप 2026 स्पर्धेत चांगली गोलंदाजी केली होती. त्यामुळे त्याला संघात घेण्यासाठी केकेआरने प्रयत्न केले आणि त्यांच्या प्रयत्नांना यश आलं. आता ब्लेसिंग प्लेइंग 11 चा भाग असेल की नाही मात्र सांगता येणं कठीण आहे. दरम्यान, ब्लेसिंग 17 मार्चला कोलकात्यात येणार आहे. तसेच कोलकाता नाईट रायडर्सचा पहिला सामना मुंबई इंडियन्सशी होणार आहे. हा सामना 29 मार्चला होणार आहे. दरम्यान, मागच्या पर्वात कोलकाता नाईट रायडर्सने सुमार कामगिरी केली होती.
