Ind Vs Aus | ‘ऑस्ट्रेलियाचं ठरलं’, भारताविरुद्धच्या दुसऱ्या कसोटीसाठी 11 खेळाडूंची निवड

दुसऱ्या कसोटीसाठी ऑस्ट्रेलियन संघात कोणताही बदल करण्यात येणार नाही, असं ऑस्ट्रेलियन टीमचे कोच जस्टीन लँगर यांनी सांगितलं आहे.

Akshay Adhav | Updated on: Dec 25, 2020 | 1:53 PM

मेलबर्न : टीम इंडिया विरुद्ध ऑस्ट्रेलिया (Australia vs India Boxing Day Test) यांच्यात उद्यापासून (26 डिसेंबर) दुसरा कसोटी सामना खेळवण्यात येणार आहे. एमसीजीवर ही मॅच होणार आहे. दुसऱ्या कसोटी मॅचमध्ये ऑस्ट्रेलियन संघात कुणाला संधी मिळणार, काही बदल होणार का?, अशी उत्सुकता क्रिकेट चाहत्यांना होती. अशातच ऑस्ट्रेलियन संघाचे कोच जस्टीन लँगर यांनी यावर भाष्य करत दुसऱ्या कसोटीसाठी ऑस्ट्रेलियन संघात कोणताही बदल करण्यात येणार नाही, असं सांगितलं आहे. (Ind Vs Aus 2nd test match 11 Player Australian Coach justin Langer Announces)

“भारताविरुद्ध शनिवारी सुरु होणाऱ्या दुसऱ्या कसोटीसाठी कोणताही बदल केला जाणार नाही. फक्त कोणतीही अनुचित घटना घडायला नको. अ‌ॅडलेड टेस्टमध्ये ऑस्ट्रेलियन संघाने भारताला केवळ 36 धावांत गारद करुन 8 विकेट्सने ऐतिहासिक विजय मिळवला. इतका मोठा आणि शानदार विजय मिळवल्यानंतर टीममध्ये काही बदल करण्याची काही गरज आहे असं वाटतं नाही”, असं जस्टीन लँगर म्हणाले. यावरुन हे स्पष्ट आहे की ऑस्ट्रेलियन संघात दुसऱ्या कसोटीसाठी कोणताही बदल करण्यात येणार नाही.

“पहिल्या कसोटीत इतका शानदार खेळ केल्यावर दुसऱ्या कसोटीसाठी बदल करणं निश्चित योग्य नाही. पहिल्या कसोटीत जो संघ खेळला तोच संघ पुन्हा एकदा दुसऱ्या कसोटीत खेळताना दिसेल. ऑस्ट्रेलियन संघ मालिका सुरु होण्यापूर्वीपासून फिटनेसशी झुंजतो आहे. आमच्या अनेक खेळाडूंना दुखापती होत आहेत. धडाकेबाज फलंदाज डेव्हिड वॉर्नरला दुखापतीच्या कारणास्वत बाहेर जावं लागलं आहे. वॉर्नरच्या जागी जो बर्न आणि मॅथ्यू वेड ऑस्ट्रेलियन डावाची सुरुवात करताना दिसून येणार आहे. ऑस्ट्रेलियाचा जलदगती गोलंदाज सीन ऐबॉट कोरोना प्रोटोकॉलमुळे दुसरी कसोटी खेळू शकणार नाही”, असं लँगर म्हणाले.

अशी आहे ऑस्ट्रेलियन टीम : टीम पेन (कर्णधार), मॅथ्यू वेड (विकेट कीपर), जो बर्न्स, मारनस लबुशेन, स्टीव स्मिथ, ट्रॅविस हेड, कॅमरून ग्रीन, पॅट कमिंस, मिचेल स्टार्क, नॅथन लॉयन, जोश हेजलवुड

दुसरीकडे भारतानेही दुसऱ्या कसोटीसाठी आपला संघ जाहीर केला आहे. दुसऱ्या कसोटी सामन्यासाठी शुभमन गिल आणि मोहम्मद सिराज या दोन नव्या चेहऱ्यांना संधी देण्यात आली आहे. या निमित्ताने सिराज आणि गिलचे कसोटी पदार्पण ठरणार आहे. मोहम्मद सिराजला दुखापतग्रस्त मोहम्मद शमीच्या जागेवर संधी देण्यात आली आहे. तर शुभमन गिलला पृथ्वी शॉच्या जागी संधी मिळाली आहे. तर दुसऱ्या सामन्यातही केएल राहुलला संधी देण्यात आलेली नाही.