IND vs NZ: फलंदाजीत विराट अन् गोलंदाजीत अर्शदीप सिंगची कमाल, पण सामनावीरचा पुरस्कार भलत्याच्याच हाती

IND vs NZ ODI Match: बुधवारी झालेल्या पहिल्या एकदिवसीय सामन्यात भारताने डकवर्थ-लुईस पद्धतीने न्यूझीलंडला पाच गडी राखून पराभूत करून मालिकेत आघाडी घेतली. ऑकलंडमध्ये झालेला हा सामना पावसामुळे बाधित झाला होता. भारताने न्यूझीलंडला ४०.२ षटकांत १८५ धावांवर सर्वबाद केले. वेगवान गोलंदाजांच्या शानदार कामगिरीनंतर विराट कोहलीने उत्कृष्ट फलंदाजी केली. त्याने ५१ चेंडूंमध्ये १३ चौकार आणि एका षटकारासह ७४ धावा केल्या, ज्यामुळे भारताने २२.४ षटकांत १४३ धावांचे डकवर्थ-लुईस पद्धतीचे लक्ष्य पूर्ण केले. कालच्या सामन्यात फलंदाजीत कोहली आणि गोलंदाजीत अर्शदीप सिंगने कमाल केली. अर्शदीप सिंगने चार विकेट्स घेतल्या पण तरीही या दोघांपैकी कोणालाच सामनावीरचा पुरस्कार मिळालेला नाही. पुरस्कार मात्र तिसऱ्याच खेळाडूला मिळाला.

ऑकलंड एकदिवसीय सामन्यात कंबोजला सामनावीर (POTM) पुरस्काराने सन्मानित करण्यात आले. त्याने कर्णधार मिचेल सँटनर (४) आणि नॅथन स्मिथ (१) यांना १० षटकांत २२ धावांत बाद केले. ढगाळ वातावरणात उसळत्या खेळपट्टीवर त्याने उत्कृष्ट गोलंदाजी केली. कंबोजला फलंदाजीची संधी मिळाली नाही.

ANSHUL KAMBOJ POTM 1st ODI vs NZ. They hv a saying cricket is full of surprises, twist n turn just like life. Way back against WI Anshul went wicket less and conceded 82 runs. Fans were saying why this clown is playing. Yesterday he bowled well n won POTM n proved them wrong. https://t.co/5xC2kW0L5a

— Ramesh Thadani (@thadani_ramesh) November 5, 2026

२५ वर्षीय कंबोजला त्याच्या कारकिर्दीतील दुसऱ्या एकदिवसीय सामन्यात पहिला ‘प्लेअर ऑफ द मॅच’ पुरस्कार मिळाला. न्यूझीलंडमध्ये एकदिवसीय सामन्यात ‘प्लेअर ऑफ द मॅच’ पुरस्कार जिंकणारा तो १५वा भारतीय क्रिकेटपटू आहे. दोन किंवा त्यापेक्षा कमी बळी न घेता एकदिवसीय सामन्यात ‘प्लेअर ऑफ द मॅच’ पुरस्कार जिंकणाऱ्या जसप्रीत बुमराहच्या पंक्तीत कंबोज सामील झाला आहे. बुमराहने २०१७ मध्ये दक्षिण आफ्रिकेविरुद्ध आणि २०२३ मध्ये पाकिस्तानविरुद्ध ही कामगिरी केली होती. ऑकलंड एकदिवसीय सामन्यात, कंबोजने वेगवान गोलंदाज अर्शदीप सिंग आणि गुरनूर ब्रार यांच्यासोबत बळी घेतले. अर्शदीपने १० षटकांत ७० धावा देऊन चार बळी घेतले. ब्रारने ९.२ षटकांत ४४ धावा देऊन तीन बळी घेतले. भारताने नाणेफेक जिंकून गोलंदाजी करण्याचा निर्णय घेतला.

पुरस्कार जिंकल्यानंतर कंबोज काय म्हणाला?

पुरस्कार जिंकल्यानंतर कंबोज म्हणाला की, त्याला फक्त मूलभूत गोष्टींवर लक्ष केंद्रित करायचे आहे. तो म्हणाला, “सातत्याने एकाच लांबीवर आणि रेषेवर गोलंदाजी करणे आणि खेळपट्टीच्या स्वरूपावर लक्ष केंद्रित न करणे महत्त्वाचे होते. मी मूलभूत गोष्टींवर लक्ष केंद्रित केले आणि योग्य रेषेवर व लांबीवर गोलंदाजी केली.  खेळपट्टीवरील उसळीमुळे मला आपल्या लांबीत लक्षणीय बदल करण्याची गरज भासली नाही. मला खेळपट्टीवरून चांगली उसळी मिळत होती, त्यामुळे मला फक्त माझ्या लांबीवर लक्ष केंद्रित करायचे होते आणि मी तेच केले.”