भारतीय क्रिकेटपटूंबाबत धक्कादायक बातमी समोर, वजन कमी करण्यासाठी चक्क ड्रग्जचा वापर करतायेत? रिपोर्ट समोर

भारतीय खेळाडूंची तंदुरुस्ती सध्या जगात सर्वोत्तम मानली जाते. विराट कोहलीनंतर असे अनेक खेळाडू आहेत, ज्यांच्याकडे केवळ चांगली शारीरिक ताकदच नाही, तर उत्कृष्ट शरीरयष्टीही आहे. मात्र, एक धक्कादायक दावा समोर आला आहे. एका अहवालानुसार, अनेक भारतीय क्रिकेटपटू स्वतःला सडपातळ आणि तंदुरुस्त ठेवण्यासाठी एका विशेष औषधाचा वापर करत आहेत. हे औषध त्यांची ताकद कायम ठेवत त्यांचे वजन लक्षणीयरीत्या कमी करत आहे. या क्रिकेटपटूंमध्ये टीम इंडिया आणि आयपीएलच्या खेळाडूंचा समावेश आहे.

क्रिकब्लॉगरच्या अहवालानुसार, “काही क्रिकेटपटू GLP-1 औषधांचा वापर करून वजन कमी करत आहेत. डॉक्टर हे औषध फक्त आजारपणातच लिहून देतात, परंतु खेळाडू वजन कमी करण्यासाठी त्याचा वापर करत आहेत. या औषधाच्या वापरामुळे भूक कमी होते आणि अशक्तपणा टाळता येतो, परिणामी चरबी कमी होते.”

अहवालानुसार, GLP-1 हे लहान आतडे आणि मोठ्या आतड्यात (कोलन) तयार होणारे एक हार्मोन आहे. हे औषध घेतल्यानंतर, पोट अन्नाचे पचन हळू करते आणि मेंदूला संकेत पाठवते की शरीर सध्या पूर्णपणे तंदुरुस्त आहे आणि खाण्याची गरज नाही. हे औषध घेणारे खेळाडू हे सर्व डॉक्टरांच्या देखरेखीखाली करतात आणि त्यासाठी हजारो रुपये खर्च येतो. हे नियमित व्यायामासोबत घेतले जाते आणि त्यामुळे वेगाने वजन कमी होते. म्हणूनच काही क्रिकेटपटू याचा वापर करत आहेत. बॉलिवूडमधील काही लोकही या औषधाचा वापर करतात.  या औषधाचे दुष्परिणामही होऊ शकतात आणि खेळाडूंकडून त्याचा वापर ही एक मोठी चिंतेची बाब आहे. आशा आहे की, बीसीसीआय या प्रकरणाकडे लक्ष देईल. पण याबाबत काही अधिकृत माहिती समोर आलेली नाही.

याआधीही अशी काही प्रकरण समोर आली होती. ज्यात खेळाडूंनी आपले वजन कमी दाखवण्यासाठी काही विशिष्ट औषधे घेतली होती. तर काही क्रिकेटपटू तर थेट मैदानातच ई- सिगारेट ओढतानाही दिसले होते. यामुळे आता बीसीसीआय या प्रकरणावर किती गंभीरपणे कारवाई करते याकडे सगळ्यांचे लक्ष लागून आहे