IND vs IRE: भारतविरुद्ध मैदानात उतरणार ‘राजस्थानचा मुलगा’; आयर्लंडच्या संघात एन्ट्री मिळवणारा जय मुंद्रा कोण?
भारतीय संघ दोन सामन्यांच्या टी-20 मालिकेसाठी आयर्लंडच्या दौऱ्यावर आहे. या मालिकेसाठी आयर्लंडच्या संघात राजस्थानमध्ये जन्मलेल्या जय मुंद्राचा समावेश आहे.
भारत आणि आयर्लंड यांच्यात दोन सामन्यांची टी-20 मालिका लवकरच सुरू होणार आहे. हे दोन्ही संघ 26 आणि 28 जून रोजी बेलफास्टमध्ये आमनेसामने येतील. आयर्लंडने नुकताच आपला संघ जाहीर केला असून, त्यात राजस्थानमध्ये जन्मलेल्या अष्टपैलू खेळाडू जय मुंद्राचा समावेश आहे. तो आयर्लंडकडून खेळणारा दुसरा आशियाई क्रिकेटपटू ठरेल. यापूर्वी पंजाबच्या सिमी सिंगने आयर्लंडकडून पदार्पण केले होते. जय मुंद्राचा जन्म राजस्थानमधील टोंक येथे झाला, जे जयपूरपासून सुमारे 100 किलोमीटर अंतरावर आहे. त्याला लहानपणापासूनच क्रिकेटची आवड होती आणि त्याने एका क्रिकेट अकादमीत प्रवेश घेतला. त्याने वेगवान गोलंदाज म्हणून सुरुवात केली आणि नंतर तो अव्वल फळीतील फलंदाज आणि डावखुरा फिरकी गोलंदाज बनला.
2021 मध्ये आयर्लंडला स्थलांतरित क्रिकेट आयर्लंडशी बोलताना त्याने स्पष्ट केले की, “अभ्यासावर लक्ष केंद्रित करण्यासाठी त्याने क्रिकेट सोडले होते. कॉलेजमध्ये असताना त्याने पुन्हा वेगवान गोलंदाजी सुरू केली.” 2019 मध्ये, त्याने नोकरी सोडून क्रिकेटला शेवटची संधी देण्याचा महत्त्वपूर्ण निर्णय घेतला. 2021 मध्ये, तो पदव्युत्तर पदवी घेण्यासाठी आयर्लंडला गेला, जिथे तो डब्लिनमधील लेन्स्टर क्रिकेट क्लबमध्ये सामील झाला आणि आयरिश देशांतर्गत क्रिकेटमध्ये त्याने स्वतःचे स्थान निर्माण केले. 2023 मध्ये, आयरिश सिनियर कप जिंकणाऱ्या लेन्स्टर संघाचा तो एक महत्त्वाचा भाग होता. त्यानंतर त्याने आपल्या कामगिरीत सुधारणा केली आणि आता आयर्लंडच्या टी20 आंतरराष्ट्रीय संघात स्थान मिळवले आहे.
आता या मालिकेत विशेष लक्ष असेल ते वैभव सूर्यवंशीकडे. वैभवला या मालिकेसाठी भारतीय संघात सामील केले आहे. आता तो आयर्लंडविरुद्ध कशी कामगिरी करतो याकडे सर्वांच्या नजरा खिळलेल्या असतील.
भारताविरुद्धच्या टी20 मालिकेसाठी आयर्लंडचा संघ: लॉर्कन टकर (कर्णधार), रॉस अडायर, बेन कॅलिट्झ, गॅरेथ डेलानी, जॉर्ज डॉकरेल, स्टीफन डोहेनी, मॅथ्यू हम्फ्रीज, गॅविन होए, मॅथ्यू हॉलार्ड, लियाम मॅकार्थी, जय मुंद्रा, हॅरी टेक्टर, टिम टेक्टर आणि रुबेन विल्सन.
भारतीय संघ: श्रेयस अय्यर (कर्णधार), अभिषेक शर्मा, संजू सॅमसन, इशान किशन, शिवम दुबे, तिलक वर्मा (उपकर्णधार), सूर्यांश शेडगे, अक्षर पटेल, वॉशिंग्टन सुंदर, रवी बिश्नोई, हर्षित राणा, अर्शदीप सिंग, वैभव सूर्यवंशी.
