पाकिस्तान क्रिकेट बोर्डाचा एक निर्णय अन् सर्वाच्या भुवय्या उंचावल्या; कसोटी कर्णधार म्हणून कोणाची केली निवड?
पाकिस्तान क्रिकेट बोर्डाने एक मोठी घोषणा केली. या घोषणेनंतर सर्वांच्याच भुवय्या उंचावल्या आहेत. पाकिस्तान क्रिकेट बोर्डाने नवीन कसोटी कर्णधाराच्या नावाची घोषणा केली आहे. तो कोण आहे ते पाहा....
पाकिस्तान क्रिकेट बोर्डाने वेस्ट इंडिज आणि इंग्लंड दौऱ्यांसाठी कसोटी संघांची घोषणा करण्यासाठी पत्रकार परिषद घेतली. पाकिस्तान कसोटी संघाच्या कर्णधारातही बदल करण्यात आला आहे. या दोन्ही महत्त्वपूर्ण दौऱ्यांसाठी स्टार फलंदाज बाबर आझमची कर्णधार म्हणून नियुक्ती करण्यात आली आहे. पाकिस्तान संघ वेस्ट इंडिजमध्ये दौऱ्याची सुरुवात करेल, जिथे ते दोन सामन्यांची कसोटी मालिका खेळतील. त्यानंतर लगेचच, पाकिस्तानी संघ इंग्लंडला रवाना होईल, जिथे दोन्ही देशांमध्ये तीन सामन्यांची कसोटी मालिका खेळली जाईल. पाकिस्तान क्रिकेट बोर्डाने शान मसूदला कसोटी कर्णधारपदावरून हटवून एक मोठा निर्णय घेतला आहे, ज्यामुळे बाबरचे कर्णधारपदी पुनरागमन झाले आहे. 2023 च्या अखेरीस कर्णधारपदाचा राजीनामा दिल्यानंतर, बाबर आझम पुन्हा एकदा पाकिस्तानचा कसोटी कर्णधार म्हणून काम पाहणार आहे. बाबर आझमने आतापर्यंत 20 कसोटी सामन्यांमध्ये पाकिस्तान संघाचे नेतृत्व केले असून, त्यापैकी 10 सामने जिंकले आहेत. दरम्यान, शान मसूदच्या कर्णधारपदाखाली पाकिस्तानने 16 पैकी 12 कसोटी सामने गमावल्याने हा बदल करण्यात आला आहे.
निवड समितीने वेस्ट इंडिज दौऱ्यासाठी 16 सदस्यीय संघाची निवड केली आहे. इंग्लंड दौऱ्यासाठी 17 सदस्यीय संघाची घोषणा करण्यात आली आहे. सौद शकीलचा इंग्लंड दौऱ्याच्या संघात 17 वा खेळाडू म्हणून समावेश करण्यात आला आहे, मात्र त्याचा सहभाग पूर्णपणे त्याच्या तंदुरुस्तीच्या अहवालावर अवलंबून असेल. याशिवाय, देशांतर्गत क्रिकेटमध्ये उत्कृष्ट कामगिरी करणारे डावखुरा फिरकी गोलंदाज अली उस्मान, उजव्या हाताचा फलंदाज मोहम्मद अवैस जफर, उजव्या हाताचा वेगवान गोलंदाज उबैद शाह आणि यष्टीरक्षक-फलंदाज मोहम्मद गाझी घोरी यांचा कसोटी संघात प्रथमच समावेश करण्यात आला आहे.
वेस्ट इंडिज दौऱ्यासाठी 16 संघ: बाबर आझम (कर्णधार), आमिर जमाल, अब्दुल्ला फजल, अली उस्मान, अझान अवेस, इमाम-उल-हक, खुर्रम शहजाद, मोहम्मद अब्बास, मोहम्मद अली, मोहम्मद रिझवान (यष्टीरक्षक), मोहम्मद अवैस जफर, मोहम्मद गाझी घोरी (यष्टीरक्षक), साजिद खान, सलमान अली आगा, शान मसूद आणि उबैद शाह.
इंग्लंड दौऱ्यासाठी संघ: बाबर आझम (कर्णधार), आमिर जमाल, अब्दुल्ला फजल, अली उस्मान, अझान अवैस, इमाम-उल-हक, खुर्रम शहजाद, मोहम्मद अब्बास, मोहम्मद अली, मोहम्मद रिझवान (यष्टीरक्षक), मोहम्मद अवैस जफर, मोहम्मद गाझी घोरी (यष्टीरक्षक), साजिद खान, सलमान अली आगा, सौद शकील (तंदुरुस्तीनुसार), शान मसूद आणि उबैद शाह.
