मुंबई इंडियन्सच्या मॅचनंतर विल्यम लेग्नफोर्डचा रहस्यमयी मृत्यू, मरिन ड्राईव्हच्या हॉटेलमध्ये सापडला मृतदेह
बीसीसीआयला मोठा धक्का बसला आहे. मुंबई इंडियन्सची मॅच झाल्यानंतर मुंबई बीसीसीआयचे इंजिनियर विल्यम लेग्नफोर्ड यांचा रहस्यमयी मृत्यू झाला आहे. त्यांचा मृतदेह एका प्रसिद्ध हॉटेलमध्ये सापडला आहे.
मुंबई इंडियन्स आणि कोलकाता नाईट रायडर्स (MI vs KKR) यांच्यातील आयपीएल सामना मुंबईच्या वानखेडे स्टेडियमवर खेळला गेला. या सामन्यात मुंबई इंडियन्सने १३ वर्षांचा जुना रेकॉर्ड मोडून विजय मिळवला. मात्र, या विजयानंतर एक धक्कादायक आणि गूढ घटना समोर आली आहे. मुंबई इंडियन्सच्या विजयानंतर दुसऱ्या दिवशी, म्हणजे ३० मार्च रोजी, मुंबईतील मरिन ड्राईव्ह परिसरातील पंचतारांकित ट्रायडन्ट हॉटेलमध्ये बीसीसीआयशी संबंधित एका व्यक्तीचा मृतदेह आढळून आला.
बीसीसीआयच्या ब्रँड कास्ट इंजिनियरचा गूढ मृत्यू
मृत व्यक्तीचे नाव विल्यम लेग्नफोर्ड (William Legnford) असून, ते बीसीसीआयचे ब्रँड कास्ट इंजिनियर होते. आयपीएल सामन्यांच्या प्रसारणासाठी ते मुंबईत आले होते. ते २४ मार्चपासून ट्रायडन्ट हॉटेलच्या रूम नंबर २७१५ मध्ये थांबले होते. ३० मार्च रोजी सकाळी रिसेप्शनिस्टने त्यांना फोन केला. पण कोणताही प्रतिसाद मिळाला नाही. हॉटेल कर्मचाऱ्यांनी रूममध्ये जाऊनही उत्तर न मिळाल्याने मास्टर कीने रूम उघडली. आत गेल्यावर कर्मचाऱ्यांना धक्कादायक दृश्य दिसले. तातडीने बोलावलेल्या डॉक्टरांनी विल्यम लेग्नफोर्ड यांना मृत घोषित केले.
पोलीस तपास सुरू
या प्रकरणाची नोंद मरिन ड्राईव्ह पोलीस स्टेशनमध्ये करण्यात आली असून, पोलिसांनी तपास सुरू केला आहे. मृत्यूचे नेमके कारण अद्याप स्पष्ट झालेले नाही. वैद्यकीय अहवाल आणि पोस्टमॉर्टम रिपोर्टनंतर अधिक माहिती समोर येण्याची शक्यता आहे.
कोण होते विल्यम लेग्नफोर्ड?
विल्यम लेग्नफोर्ड हे मूळचे ब्रिटिश नागरिक होते. ते आयपीएल २०२६ साठी मुंबईत काम करत होते. या गूढ मृत्यूमुळे आयपीएल वर्तुळात खळबळ उडाली आहे. पोलिसांकडून पुढील तपास सुरू असून, अधिक माहिती समोर येण्याची शक्यता आहे.
