Renault Duster Strong: 29 KMचं शानदार मायलेज, दमदार फिचर्स; मारुतीला टक्कर देणार आलिशान SUV, विक्री सुरु
रेनॉल्ट इंडियाने आपल्या नवीन डस्टर स्ट्रॉंग हायब्रीड ई-टेक 160ची डिलिव्हरी सुरू केली आहे. कंपनीने 17 ऑक्टोबर रोजी ही एसयूव्ही लॉन्च केली होती.
Renault Duster Strong Hybrid E-Tech 160: तुम्हीही चारचाकी गाडी घेण्याचा विचार करताय का? आता बाजारामध्ये मारुती सुझूकीच्या गाड्यांना टक्कर देण्यासाठी एक दमदार एसयुव्ही येत आहे. रेनॉल्ट इंडियाने आपल्या नवीन डस्टर स्ट्रॉंग हायब्रीड ई-टेक 160ची डिलिव्हरी सुरू केली आहे. कंपनीने 17 ऑक्टोबर रोजी ही एसयूव्ही लॉन्च केली होती आणि आता, जवळपास तीन आठवड्यांनंतर गाडीच्या चाव्या मिळण्यास सुरुवात झाली आहे. पहिली डिलिव्हरी हैदराबादच्या हायटेक सिटीमधील कंपनीच्या नवीन शोरूममध्ये झाली. काय आहे या गाडीची खासियत अन् फिचर्स? जाणून घ्या
रेनॉल्ट डस्टर हायब्रीड: किंमत आणि व्हेरिएंट्स
रेनॉल्ट डस्टर स्ट्रॉंग हायब्रीड ई-टेक 160 ही इव्होल्यूशन, टेक्नो आणि इमोशन या तीन व्हेरिएंट्समध्ये खरेदी करता येईल. बेस इव्होल्यूशन व्हेरिएंटची किंमत 16. 99 लाख (एक्स-शोरूम) आहे. टॉप-ऑफ-द-लाइन इमोशन व्हेरिएंटची किंमत 19.49 लाख (एक्स-शोरूम) असेल. या प्रास्ताविक किमती त्या ग्राहकांसाठी लागू आहेत ज्यांना 31 डिसेंबर 2026 पर्यंत एसयूव्हीची डिलिव्हरी मिळेल. रेनॉल्ट आर-पासद्वारे बुकिंग करणाऱ्या ग्राहकांना प्राधान्याने डिलिव्हरी मिळेल. इतर ग्राहक 21,000 रुपये भरून कार बुक करू शकतात.
रेनॉल्ट डस्टर हायब्रीड: इंजिन आणि पॉवर
या एसयूव्हीमध्ये 1.8 -लिटर नॅचरली ॲस्पिरेटेड 4 -सिलेंडर पेट्रोल इंजिन, दोन इलेक्ट्रिक मोटर्स आणि 1.4 kWh लिथियम-आयन बॅटरी आहे. ही एकत्रित हायब्रीड प्रणाली 160 PS पॉवर निर्माण करते. इलेक्ट्रिक ट्रॅक्शन मोटर २०८ Nm टॉर्क निर्माण करते. यात मल्टीमोड ऑटोमॅटिक ट्रान्समिशन आहे, जे इंजिन आणि इलेक्ट्रिक मोटरच्या शक्तीचे व्यवस्थापन करते. कंपनीचा दावा आहे की ही एसयूव्ही 9.6 सेकंदात 0 ते 100 किमी प्रति तास वेग गाठू शकते. याची बॅटरी चार्ज करण्यासाठी वेगळ्या चार्जिंग पॉईंटची आवश्यकता नाही. गाडी चालवताना ब्रेक लावल्याने आणि पेट्रोल इंजिनमधून निर्माण होणाऱ्या ऊर्जेचा वापर करून बॅटरी चार्ज होते. म्हणजेच ही एक सेल्फ-चार्जिंग हायब्रीड एसयूव्ही आहे.
ग्राहकांचा जबरदस्त प्रतिसाद!
दरम्यान, रेनॉल्ट इंडियाच्या एका अधिकाऱ्याने सांगितले की, कंपनी दिवाळीच्या सुमारास ग्राहकांना डस्टर स्ट्रॉंग हायब्रीड ई-टेक 160 च्या चाव्या देण्याचे आपले आश्वासन पूर्ण करत आहे. कंपनीच्या मते, या एसयूव्हीला ग्राहकांकडून मोठा प्रतिसाद मिळत आहे. रेनॉल्ट भारतातील आपल्या शोरूम्सचे नूतनीकरण करण्याच्या योजनेवरही काम करत आहे. जुलै 2027 पर्यंत 24 प्रमुख शहरांमधील सर्व 73 शोरूम्सना नवीन रिटेल फॉरमॅटमध्ये रूपांतरित करण्याचे कंपनीचे उद्दिष्ट आहे. यापैकी 30 शोरूम्स आधीच नवीन डिझाइन आणि वैशिष्ट्यांसह अद्ययावत करण्यात आले आहेत.
