लावाच्या 5000mAh बॅटरी आणि 8GB पर्यंत रॅम असलेल्या ‘या’ स्वस्त फोनची विक्री सुरू

देशांतर्गत असलेल्या स्मार्टफोन ब्रँड लावा ने नुकताच बोल्ड एन2 प्रो लाँच केला असून या फोनची विक्री ६ एप्रिलपासून सुरू झाली आहे. 10 हजार रूपयांपेक्षा कमी किंमतीचा हा फोन फ्लिपकार्टवर उपलब्ध आहे. याच्या प्रमुख वैशिष्ट्यांमध्ये 50 मेगापिक्सेलचा एआय रिअर कॅमेरा, 120 हर्ट्झचा रिफ्रेश रेट आणि 5000 mAh क्षमतेची बॅटरी यांचा समावेश आहे, जे परफॉर्मन्स, मनोरंजन आणि दैनंदिन वापरामध्ये एक संतुलित अनुभव देतात. चला तर या फोनमध्ये कोणते फिचर्स आहेत ते त्यांची किंमत जाणून घेऊयात.

UNISOC T7250 ऑक्टा-कोअर प्रोसेसरवर चालणाऱ्या या फोनमध्ये 4GB रॅम आणि 4GB व्हर्च्युअल रॅम आहे. याव्यतिरिक्त, फोटो, व्हिडिओ आणि बरेच काही साठवण्यासाठी 128GB स्टोरेज आहे. IP54-रेटेड टिकाऊपणा, टाइप-सी फास्ट चार्जिंग आणि लावाची मोफत होम सर्व्हिस यांसारख्या वैशिष्ट्यांचाही यात समावेश आहे. हा फोन एक्लिप्स ग्रे आणि अरोरा गोल्ड या दोन रंगांमध्ये उपलब्ध आहे.

भारतात Lava Bold N2 Pro ची किंमत

या हँडसेटची किंमत 7 हजार 999 रूपये आहे. हा फोन आता फ्लिपकार्टवर उपलब्ध आहे. स्पर्धेच्या बाबतीत बोलायचे झाल्यास, हा बजेट फोन या किंमतीच्या रेंजमध्ये सॅमसंग गॅलेक्सी M07, रेडमी A5 आणि Ai प्लस पल्स 2 सारख्या मॉडेल्सशी स्पर्धा करतो.

लावा बोल्ड एन२ प्रो फिचर्स

डिस्प्ले: या फोनमध्ये 120Hz रिफ्रेश रेट सपोर्ट असलेला 6.75-इंचाचा HD+ रिझोल्यूशन डिस्प्ले आहे.

ऑपरेटिंग सिस्टम: हा बजेट फोन अँड्रॉइड 15 वर चालतो आणि कंपनीचा दावा आहे की या डिव्हाइसला अँड्रॉइड 16 चे अपडेट आणि 2 वर्षांचे सुरक्षा अपडेट्स मिळतील.

चिपसेट: वेग आणि मल्टीटास्किंगसाठी लावा कंपनीच्या या बजेट फोनमध्ये युनिसॉक टी7250 प्रोसेसर देण्यात आला आहे.

कॅमेरा: या फोनमध्ये मागील बाजूस 50-मेगापिक्सलचा मुख्य कॅमेरा आणि पुढील बाजूस 8-मेगापिक्सलचा कॅमेरा आहे.

आयपी रेटिंग: या फोनला धूळ आणि पाण्याच्या शिडकाव्यापासून संरक्षणासाठी आयपी54 रेटिंग मिळाले आहे.

कनेक्टिव्हिटी: हा हँडसेट ब्लूटूथ, वाय-फाय, जीपीएस आणि ४जी एलटीई कनेक्टिव्हिटीला सपोर्ट करतो.

बॅटरी: यामध्ये 18W पर्यंत फास्ट चार्जिंग सपोर्टसह पॉवरफूल 5000mAh बॅटरी देण्यात आली आहे.