युट्यूबला 20 वर्षं पूर्ण, पण या गोष्टी अजूनही 99% लोकांच्या लक्षात आल्या नाहीत!
युट्यूबचा 20 वर्षांचा प्रवास केवळ व्हिडिओ शेअरिंगपर्यंत मर्यादित राहिला नाही. वापरकर्त्यांचा संवाद, कंटेंटचा स्फोट, आणि तांत्रिक प्रगती यामुळे ते जगातील दुसऱ्या क्रमांकाचं डिजिटल व्यासपीठ ठरलं. वुडस्टॉकपासून गूगलपर्यंतची युट्यूबची कहाणी हे एक यशस्वी डिजिटल क्रांतीचं उदाहरण आहे.
वर्ष 2005 मध्ये सुरू झालेलं युट्यूब हे जगातील दुसऱ्या क्रमांकाचं सर्वाधिक वापरलं जाणारं डिजिटल व्यासपीठ ठरलं आहे. 2025 मध्ये युट्यूबने आपलं 20 वर्षांचं प्रवास पूर्ण केला. या दोन दशकांत युट्यूबने केवळ मनोरंजनाचं नाही, तर माहिती, शिक्षण आणि संवादाचंही मोठं माध्यम बनून डिजिटल क्रांतीला गती दिली. आज जगभरात दररोज सुमारे 2 कोटी व्हिडिओ अपलोड होतात. युट्यूबचा वापरकर्ता अनुभव वाढवण्यासाठी नवीन फीचर्स लाँच होत आहेत, ज्यात यावर्षी “मल्टीव्ह्यू फॉर टीव्ही”, “व्हॉइस रिप्लाय” आणि “Ask Music” यांचा समावेश आहे.
युट्यूबबद्दल 5 खास गोष्टी ज्या 99 टक्के लोकांना माहीत नाहीत
1. रोज 2 कोटी व्हिडिओ अपलोड : 2025 पर्यंत युट्यूबवर दररोज सरासरी 2 कोटी नवीन व्हिडिओ अपलोड होतात. हे युट्यूबवरील प्रचंड कंटेंट प्रोडक्शन आणि वापरकर्त्यांच्या सहभागाचं मोठं उदाहरण आहे.
2. ‘वुडस्टॉक’ कोडनेम : युट्यूब म्युझिकची सुरुवातीला ‘वुडस्टॉक’ या कोडनेमने ओळख होती. 2025 मध्ये युट्यूब म्युझिक आणि युट्यूब किड्स या दोन्ही प्लॅटफॉर्मना 10 वर्षं पूर्ण होणार आहेत.
3. दिवसभरात 10 कोटींपेक्षा जास्त कमेंट्स : 2024 मध्ये दररोज सुमारे 10 कोटी युट्यूब कमेंट्स पोस्ट झाल्या. निर्माते दररोज 1 कोटींहून अधिक कमेंट्सना “हार्ट” देतात, ज्यातून प्रेक्षक आणि कंटेंट क्रिएटर्समधील परस्पर संवाद स्पष्ट होतो.
4. रोज 3.5 अब्ज लाइक्स : वर्षभराच्या आकडेवारीनुसार, युट्यूबवरील व्हिडिओंना दररोज सरासरी 3.5 अब्ज लाइक्स मिळतात. हे आकडे प्रेक्षक आणि कंटेंटमधील भावनिक नातं दाखवतात.
5. 300+ म्युझिक व्हिडिओंनी गाठला अब्ज व्ह्यूजचा टप्पा : आजवर 300 पेक्षा जास्त म्युझिक व्हिडिओंनी 1 अब्ज व्ह्यूज पार केले आहेत. एड शीरनचा ‘Shape of You’ आणि लुईस फॉन्सीचा ‘Despacito’ अवघ्या 97 दिवसांत ही कामगिरी केली.
युट्यूबची सुरुवात आणि प्रवास
युट्यूबची स्थापना 14 फेब्रुवारी 2005 रोजी चाड हर्ले, स्टीव चेन आणि जावेद करीम या पेपलच्या माजी कर्मचाऱ्यांनी केली. ‘मी अॅट द झू’ हा युट्यूबवरील पहिला व्हिडिओ 23 एप्रिल 2005 रोजी अपलोड झाला. 19 सेकंदांचा हा व्हिडिओ सॅन डिएगोच्या प्राणिसंग्रहालयातील आहे.
नोव्हेंबर 2006 मध्ये गूगलने युट्यूब 1.65 अब्ज डॉलर्सला विकत घेतलं आणि तेव्हापासून युट्यूब गूगलचं व्यासपीठ ठरलं. बीटा आवृत्तीत सुरू झाल्यावर काही महिन्यांतच युट्यूबवर दररोज 30,000 प्रेक्षक येऊ लागले. डिसेंबर 2005 मध्ये अधिकृत लाँचनंतर हा आकडा 20 लाख दृश्यांवर गेला. 2006 च्या सुरुवातीपर्यंत 2.5 कोटी व्हिडिओ अपलोड झाले होते.
