बाबो! भिंत तोडताच समोर पिवळाधम्म खजिना; किंमत ऐकून तुमचे डोळेही विस्फारतील!

बेल्जियममधील ईस्ट फ्लँडर्स येथील एका जुन्या घराचे नूतनीकरण सुरू होते. कामगारांना नवीन सांडपाण्याच्या पाईप्स टाकण्याचे काम देण्यात आले होते. घराच्या पायामध्ये खोदकाम सुरू होते आणि सर्व काही नेहमीप्रमाणे चालू होते. अचानक, भिंतीच्या आतून एक पिवळा पदार्थ बाहेर येऊ लागला. सुरुवातीला कामगार गोंधळले, पण खोदकाम करताना त्यांना सोन्याच्या विटा आणि नाणी सापडली. 18 वर्षीय कोबेला सुरुवातीला वाटले की ती 1 युरोची नाणी आहेत. मग, जेव्हा त्याला सोन्याचा एक खडा दिसला, तेव्हा त्याच्या लक्षात आले की ही एक क्षुल्लक गोष्ट नसून, लाखो रुपयांचा खजिना आहे. काही वेळातच, ज्या घरात कामगार पाईप्स टाकण्यासाठी आले होते, त्या घरात अंदाजे 90 लाख युरो, म्हणजेच सुमारे 100 कोटी रुपयांचे सोने सापडले. हा खजिना शोधणाऱ्यांमध्ये उन्हाळ्याच्या सुट्टीत काम करणारा एक 18 वर्षांचा विद्यार्थी होता. त्यांना तिथे सोन्याच्या नाण्यांनी भरलेले एक ताट सापडले.

18 वर्षीय कोबीने बेल्जियन टीव्ही चॅनल व्हीआरटीला सांगितले, “आमची पहिली प्रतिक्रिया अविश्वास आणि आश्चर्याची होती. सुरुवातीला मला वाटले की ती 1 युरोची नाणी आहेत. पण नंतर आम्हाला सोन्याचा एक तुकडा दिसला. तेव्हा आमच्या लक्षात आले की ही काहीतरी गंभीर गोष्ट आहे. घटनास्थळी उपस्थित असलेले साईट मॅनेजर, मारिओ यांनी स्पष्ट केले की, तिथे सोन्याच्या इतक्या विटा आणि नाणी होती की ती स्वतःजवळ ठेवणे जवळजवळ अशक्य होते. शिवाय, ही चोरीच ठरली असती.” कामगारांनी तात्काळ पोलिसांना माहिती दिली आणि संपूर्ण खजिना सुरक्षितपणे हलवण्यात आला.”

ज्या ठिकाणी हे सोने सापडले, ती जागा डेंडरमोंडे परिसरातील लोकांना मदत करणाऱ्या ‘सीएडब्ल्यू ओस्ट-व्लांडरन’ (CAW Oost-Vlaanderen) या संस्थेची आहे. संस्थेचे संचालक, गीर्ट हिलार्ट म्हणाले की, या शोधाने त्यांना आश्चर्य वाटले आणि भविष्यात संस्थेला असा खजिना सापडल्यास, त्याचा उपयोग लोकांना मदत करण्यासाठी केला जाऊ शकेल अशी आशा त्यांनी व्यक्त केली. ते म्हणाले की संस्थेला दररोज तातडीच्या गरजांना सामोरे जावे लागते. पण सध्या तरी, हे सोने ना कामगारांचे आहे, ना संस्थेचे. बेल्जियन कायद्यानुसार, खऱ्या मालकाला खजिन्यावर दावा करण्यासाठी पाच वर्षे, म्हणजेच 1,823 दिवसांचा कालावधी असतो. जर या काळात कोणताही मालक पुढे आला नाही आणि सोन्याचा संबंध एखाद्या गुन्ह्याशी असल्याचे सिद्ध झाले नाही, तर दिवाणी कायद्यानुसार खजिना शोधणारा आणि मालमत्तेचा मालक यांच्यात विभागला जाऊ शकतो.

खजिन्याची बातमी पसरताच लोकांची उत्सुकता वाढली. पोलिसांनी लोकांना अधिक सोन्याच्या शोधात बांधकाम सुरू असलेल्या जागेजवळ न जाण्याचा इशारा दिला. पोलिसांच्या म्हणण्यानुसार, घराची कसून तपासणी करण्यात आली असून, जप्त केलेले सोने सुरक्षित ठिकाणी पाठवण्यात आले आहे. विशेष म्हणजे, या बातमीला प्रतिसाद म्हणून स्थानिक पोलिसांनी त्यांच्या फेसबुक प्रोफाइल पिक्चरवर सोन्याच्या नाण्याचे चित्र लावले.