Aadhaar Card बाबत मोठी अपडेट, सर्वसामान्यांसाठी वार्ता काय?
Free Aadhaar Card Update : ज्या नागरिकांना त्यांच्या आधार कार्डमधील माहितीत बदल करायचा आहे, त्यांच्यासाठी ही बातमी महत्त्वाची आहे. आधार कार्डमधील माहितीत बदल करण्यासाठी 14 डिसेंबरपर्यंत मोफत अपडेट करता येत होते. आता ही विंडो बंद झाली आहे. पण सरकारने अजून एक निर्णय घेतला आहे.
आधार कार्ड मोफत अपडेट, अद्ययावत करण्याची अखेरच्या तारखेत सरकारने बदल केला आहे. 14 डिसेंबर ही त्यासाठीची अंतिम मुदत होती. पण भारतीय विशिष्ट ओळख प्राधिकरणाने (UIDAI) ही अंतिम मुदत पुन्हा वाढवण्याचा निर्णय घेतला आहे. आता नागरिकांना मोफत ऑनलाईन दस्तावेज अपलोड करण्याची सुविधा 14 जून 2025 रोजी पर्यंत वाढवण्यात आली आहे. सुरुवातीला ही मोफत सुविधा 14 जून, 2024 अशी निश्चित करण्यात आली होती. त्यानंतर ती 14 सप्टेंबर, 2024 रोजीपर्यंत आणि या 14 डिसेंबरपर्यंत वाढवण्यात आली होती.
या पोर्टलवर करा आधार कार्ड अपडेट
नागरिकांना myAadhaar पोर्टल https://myaadhaar.uidai.gov.in/ च्या माध्यमातून 14 जून 2025 रोजीपर्यंत मोफत बदल करता येईल. कागदपत्र अपलोड करता येतील. आधार कार्डमधील हा बदल केवळ ऑनलाईन अपडेशनसाठी आहे. पण तुम्ही आधार केंद्रावर जाऊन कागदपत्रांआधारे आधार कार्डमध्ये बदल कराल तर त्यासाठी 25 रुपये शुल्क अदा करावे लागेल.
असे करा आधार कार्ड अपडेट
UIDAI च्या https://myaadhaar.uidai.gov.in/ वर जा
अथवा https://ssup.uidai.gov.in/ssup/ यावर लॉगिन करा
12 अंकांचा आधार कार्ड क्रमांक आणि कॅप्चा कोड टाकून लॉगिन व्हा
ओटीपीचा पर्याय निवडा, पुढील प्रक्रिया करा
आधार संबंधीत मोबाईल क्रमांकावर हा ओटीपी येईल
ओटीपी टाकून ‘अपडेट आधार ऑनलाइन’ हा पर्याय निवडा
‘प्रोसीड टू अपडेट आधार’ हा पर्याय निवडा, माहिती भरा
राजपत्राआधारे नावात बदल
आधार कार्ड अपडेट करण्यासाठी गॅझेट आवश्यक आहे. याविषयी UIDAI ने नवा निर्णय घेतला आहे. नावातील बदलाविषयी आता कडक भूमिका घेण्यात आली आहे. नावातील बदलाआधारे मोठा घोटाळा होण्याची शक्यता लक्षात घेत राजपत्र आवश्यक करण्यात आले आहे. आता नावात बदलासाठी राजपत्र सादर करावं लागणार आहे.
10 वर्षें झाल्यास करा बदल
आधार कार्ड अत्यंत आवश्यक पुरावा मानण्यात येतो. अनेक सरकारी आणि गैर सरकारी कामासाठी आधार कार्ड दाखवावे लागते. भारतीय विशिष्ट ओळख प्राधिकरण वेळोवेळी आधार कार्ड अपडेटविषयी निर्देश देते. सध्या आधार कार्डला 10 वर्षांपेक्षा अधिकचा कालावधी झाला असेल तर आधार कार्डमध्ये अपडेट मोफत करता येते.
