Ajit Pawar Death In Plane Crash : अश्रूंचा बांध फुटला! बारामतीत पोहोचताच सुनेत्रा पवार यांना अश्रू अनावर

अजित पवारांच्या अकाली निधनानंतर बारामतीत शोकाकुल वातावरण निर्माण झाले आहे. एका विमान अपघातात अजित पवारांचे निधन झाल्याने संपूर्ण महाराष्ट्रात हळहळ व्यक्त होत आहे. बारामती येथील ज्या धावपट्टीवर त्यांचे विमान उतरणार होते, त्याच ठिकाणी हा दुर्दैवी अपघात घडला. या घटनेने महाराष्ट्राने एक उमदे आणि महत्त्वाचे नेतृत्व गमावले आहे.

अजित पवारांच्या पत्नी सुनेत्रा पवार, खासदार सुप्रिया सुळे, पुत्र पार्थ पवार आणि श्रीनिवास पवार यांच्यासह कुटुंबातील इतर सदस्य आणि नातेवाईक बारामतीत दाखल झाले आहेत. संसदेच्या अधिवेशनासाठी दिल्लीत असलेल्या सुनेत्रा पवार आणि सुप्रिया सुळे यांना ही बातमी धडकल्यानंतर त्यांनी तातडीने बारामतीकडे प्रस्थान केले. कुटुंबावर कोसळलेल्या दुःखात त्यांना आधार देण्यासाठी प्रफुल्ल पटेल आणि राणा जगजितसिंह पाटील यांच्यासारखे नेतेही उपस्थित आहेत. ही घटना पवार कुटुंबासाठी आणि महाराष्ट्रासाठी कधीही भरून न निघणारी पोकळी निर्माण करून गेली आहे.