Anil Parab : रामदास कदमांवर अब्रू नुकसानीचा दावा दाखल होणार? बाळासाहेबांच्या मृत्यूवरील आरोपांना परबांचे प्रत्युत्तर

शिवसेना नेते अनिल परब यांनी रामदास कदम यांच्यावर बाळासाहेब ठाकरे यांच्या मृत्यूबाबत केलेल्या गंभीर आरोपांना पत्रकार परिषदेत सडेतोड प्रत्युत्तर दिले आहे. परब यांनी कदम यांचे आरोप “नीचपणा” असल्याचे संबोधले. अनिल परब म्हणाले की, बाळासाहेबांच्या अंतिम दिवसांत ते २४ तास उपस्थित होते आणि ते या घटनेचे प्रत्यक्ष साक्षीदार आहेत. कदम यांनी केलेले आरोप हे महाराष्ट्रातील सध्याच्या प्रश्नांवरून लक्ष विचलित करण्याचा कुटील डाव असल्याचे परब यांनी म्हटले.

अनिल परब यांनी रामदास कदम यांनी स्वतःची नार्को चाचणी करण्याची मागणी केली होती, ती स्वीकारली आहे. तसेच, रामदास कदम यांनी केलेल्या खोट्या आरोपांविरोधात अब्रू नुकसानीचा दावा दाखल करणार असल्याचे परब यांनी जाहीर केले. या दाव्यामधून मिळणारी सर्व रक्कम दुष्काळग्रस्त शेतकऱ्यांच्या मदतीसाठी देण्यात येईल, असा निर्णय परब यांनी घेतला आहे.