Girija Raut | 2 कोटींचा दबाव टाकला आणि…गिरीजा राऊतांचा मोठा गौप्यस्फोट!

शिवसेना (उद्धव बाळासाहेब ठाकरे) गटाचे माजी खासदार विनायक राऊत यांच्या कुटुंबाविरोधात तक्रार दाखल केलेल्या गिरीजा राऊत यांनी आता राजकीय दबाव आणि मानसिक छळाबाबत गंभीर आरोप केले आहेत. माध्यमांशी संवाद साधताना त्यांनी आपल्या वैवाहिक आयुष्यात सातत्याने मानसिक त्रास सहन करावा लागल्याचा दावा केला.

गिरीजा राऊत म्हणाल्या की, “राजकीय दबाव होता, मात्र त्यापेक्षाही जास्त मानसिक त्रास मला घरातील सदस्यांकडून दिला जात होता. सतत दबाव टाकून मला मानसिकदृष्ट्या खचवण्याचा प्रयत्न करण्यात आला.”

यावेळी त्यांनी पती गितेश राऊत यांच्यावरही गंभीर आरोप करत सांगितले की, “माझ्या पतीने मला मारहाण करत, ‘माझ्या वडिलांनी निवडणुकीसाठी दोन कोटी रुपये खर्च केले आहेत. तुझ्यामुळे आमच्या प्रतिमेला धक्का लागला तर तुला सोडणार नाही,’ अशी धमकी दिली होती.” तसेच, आपल्याशी अत्यंत विकृत पद्धतीने वागणूक देण्यात आल्याचाही दावा त्यांनी केला.

दरम्यान, गिरीजा राऊत यांनी यापूर्वीही विनायक राऊत आणि त्यांच्या कुटुंबीयांविरोधात कौटुंबिक छळासह अन्य गंभीर आरोप करत पोलिसांत तक्रार दाखल केली आहे. या प्रकरणाचा तपास संबंधित पोलीस करत असून, दोन्ही बाजूंकडून विविध दावे आणि प्रतिदावे समोर येत आहेत.

या प्रकरणातील आरोपांबाबत अंतिम सत्य तपास आणि न्यायालयीन प्रक्रियेनंतरच स्पष्ट होणार आहे.