Girish Mahajan | बंडखोरांना गिरीश महाजनांचा थेट इशारा; कारवाई अटळ म्हणत दिला मोठा संदेश!

विधान परिषद निवडणुकीच्या पार्श्वभूमीवर महायुतीतील बंडखोरीच्या मुद्द्यावर भाजप नेते आणि मंत्री गिरीश महाजन यांनी स्पष्ट भूमिका मांडली आहे. उमेदवारी अर्ज माघारीची प्रक्रिया पूर्ण झाल्यानंतर बंडखोर उमेदवारांबाबत पक्ष नेतृत्व कठोर भूमिका घेणार असल्याचे संकेत त्यांनी दिले आहेत. माध्यमांशी संवाद साधताना महाजन म्हणाले की, महायुतीतील जागावाटप हे तिन्ही पक्षांच्या प्रमुखांच्या समन्वयातून आणि परस्पर सहमतीने करण्यात आले आहे. त्यामुळे अधिकृत निर्णयानंतरही ज्यांनी बंडखोरीचा मार्ग स्वीकारला, त्यांच्यावर कारवाई होणारच आहे.

गिरीश महाजन यांनी सांगितले की, महायुतीमध्ये भाजप, शिवसेना आणि राष्ट्रवादी काँग्रेस या तिन्ही पक्षांनी एकत्रित चर्चा करून जागावाटप निश्चित केले होते. प्रत्येक पक्षाने आपल्या कार्यकर्त्यांच्या भावना आणि स्थानिक परिस्थिती लक्षात घेऊन निर्णय घेतले. मात्र काही ठिकाणी नाराजीमुळे बंडखोरी झाली असून ती पक्ष शिस्तीच्या विरोधातील बाब आहे. त्यामुळे संबंधित पक्ष आपल्या स्तरावर योग्य तो निर्णय घेतील, असेही त्यांनी स्पष्ट केले.

यावेळी बंडखोर उमेदवारांविरोधात कारवाईबाबत विचारले असता महाजन म्हणाले, “हा प्रत्येक पक्षाचा अंतर्गत विषय आहे. मात्र ज्यांनी पक्षाच्या अधिकृत भूमिकेविरोधात जाऊन बंडखोरी केली आहे, त्यांच्यावर निश्चितपणे कारवाई होईल.” त्यांच्या या वक्तव्यामुळे विधान परिषद निवडणुकीनंतर महायुतीतील बंडखोर नेत्यांवर शिस्तभंगाची कारवाई होण्याची शक्यता अधिक बळावली आहे.

दरम्यान, निवडणूक प्रक्रियेनंतर महायुतीतील अंतर्गत नाराजी कितपत कमी होते आणि पक्ष नेतृत्व बंडखोरांबाबत कोणती भूमिका घेते, याकडे राज्याच्या राजकीय वर्तुळाचे लक्ष लागले आहे.