पालकमंत्र्यांची किंमत किती ? अवघे ५१ रुपये, कुणी लावले ठिकठिकाणी पोस्टर्स ?

बीड : राज्यात अवकाळी पावसाने शेतकऱ्यांचे अतोनात नुकसान केले. ऐन हंगामात शेतकऱ्यांना मोठा आर्थिक फटका बसला. अशातच सरकारने मदतीचे आश्वासन देऊनही अद्याप मदत न मिळाल्यामुळे शेतकरी आक्रमक झाले आहेत. त्यात त्यांना शेतकरी संघटनेचीही साथ मिळाली आहे. बीडमधीलही संतप्त शेतकऱ्यांनी पालकमंत्र्यांविरोधात जोरदार पवित्रा घेतला आहे. बीडमध्ये सर्वाधिक नुकसान होऊनही पालकमंत्री अतुल सावे अद्याप शेतकऱ्यांच्या बांधावर गेले नाहीत. त्यांनी साधी विचारपूसही केली नाही आक्रमक झालेल्या स्वाभिमानी शेतकरी संघटनेने ‘पालकमंत्री बेपत्ता आहेत. त्यांना शोधून काढणाऱ्याला 51 रुपयांचे बक्षीस देण्याचे जाहीर केलं आहे. तसा आशयाचे पोस्टरदेखील गेवराई तालुक्यात लावण्यात आले आहेत.