मतदार यादीतील त्रुटींवर खुलासा करा! जयंत पाटलांचा निवडणूक आयोगाला सवाल

राष्ट्रवादी काँग्रेसचे नेते जयंत पाटील यांनी मतदार यादीतील त्रुटी आणि निवडणूक आयोगाच्या कार्यपद्धतीवर प्रश्नचिन्ह उपस्थित केले आहे. राज्य निवडणूक आयोग आणि केंद्रीय निवडणूक आयोगाशी झालेल्या चर्चा असमाधानकारक ठरल्याचे पाटील यांनी सांगितले. या पार्श्वभूमीवर, मतदार यादीतील चुका लोकांपर्यंत पोहोचवण्यासाठी आणि लोकशाही मूल्यांचे संरक्षण करण्यासाठी सर्वपक्षीय मोर्चा काढण्याचा निर्णय घेण्यात आला आहे. हा मोर्चा १ नोव्हेंबर रोजी मुंबईत निघणार आहे.

पाटील यांनी म्हटले की, ज्यांना मतदार यादीतील चुकीच्या नोंदींचा फायदा होतो, ते कदाचित या मोर्चात सहभागी होणार नाहीत. मात्र, ज्यांना लोकशाहीला धक्का पोहोचवण्याऱ्या कृत्याबद्दल चीड आहे, ते या मोर्चात सहभागी होतील. शरद पवार, शशिकांत शिंदे, राज ठाकरे, हर्षवर्धन सकपाळ, प्रकाश रेड्डी, कॉम्रेड अजित नऊले यांच्यासह अनेक नेत्यांनी या मोर्चाला पाठिंबा दिला आहे. निवडणूक आयोगाने मतदार यादीतील चुका दुरुस्त कराव्यात आणि डुप्लिकेट मतांचा प्रश्न कसा हाताळणार याचा खुलासा करावा, अशी मागणी पाटील यांनी केली. लोकशाहीच्या पारदर्शकतेसाठी हे आवश्यक असल्याचे त्यांनी अधोरेखित केले.