Assembly Seating Row: आमच्यावर अन्याय का? विधानसभेत आसन व्यवस्थेवरून ठाकरेंची सेना अन् काँग्रेसमध्ये वाद

नागपूर येथे सुरू असलेल्या महाराष्ट्र विधानसभेच्या हिवाळी अधिवेशनात आसन व्यवस्थेवरून उद्धव ठाकरे यांच्या नेतृत्वाखालील शिवसेना गट आणि काँग्रेसमध्ये वाद निर्माण झाला आहे. मिळालेल्या माहितीनुसार, ठाकरेंच्या २० आमदारांपैकी १४ आमदारांना पुढील रांगेत जागा देण्यात आली होती. यावर काँग्रेसने आक्षेप घेतला की, त्यांच्या ज्येष्ठ आमदारांना ठाकरेंच्या कनिष्ठ आमदारांच्या मागे बसावे लागत आहे. काँग्रेसच्या तक्रारीनंतर विधिमंडळाने त्यांच्या सहा आमदारांना पुढील रांगेत बसण्याची व्यवस्था केली. मात्र, यामुळे आता उद्धव ठाकरे गटाने नाराजी व्यक्त केली आहे. ठाकरे गटाचे आमदार भास्कर जाधव यांनी या आसन बदलावर आक्षेप घेत विधानसभा अध्यक्षांची भेट घेतली. “प्रत्येक वेळी आमच्यावर अन्याय का?” असा प्रश्न जाधव यांनी उपस्थित केला असून, त्यांनी आपल्या आमदारांसाठी योग्य आसन व्यवस्था देण्याची मागणी केली आहे. या प्रकरणामुळे सभागृहात दोन्ही पक्षांमध्ये तणाव निर्माण झाल्याचे चित्र आहे.