Eknath Shinde : एकनाथ शिंदे दिल्लीत, PM मोदींची घेतली भेट, काय झाली चर्चा?

उपमुख्यमंत्री एकनाथ शिंदे यांनी दिल्लीत पंतप्रधान नरेंद्र मोदी यांची भेट घेतली. ही भेट दिवाळीच्या शुभेच्छा देण्यासाठी तसेच महाराष्ट्रातील विकासकामांवर चर्चा करण्यासाठी होती, असे शिंदेंनी स्पष्ट केले. महाराष्ट्रात झालेल्या विकासावर पंतप्रधान मोदींनी आनंद व्यक्त केल्याचे आणि पूरग्रस्त शेतकऱ्यांच्या स्थितीवर चर्चा झाल्याचेही शिंदेंनी सांगितले.

मात्र, स्थानिक स्वराज्य संस्थांच्या आगामी निवडणुकांच्या पार्श्वभूमीवर या भेटीत राजकीय चर्चा झाल्याची शक्यता वर्तवली जात आहे. विरोधी पक्षांनी या दौऱ्यावर टीका करत, एकनाथ शिंदे दिल्लीतील नेतृत्वाच्या सूचनेनुसार काम करतात, असे म्हटले आहे. काँग्रेसचे प्रदेशाध्यक्ष हर्षवर्धन सपकाळ यांनी भाजप मित्रपक्षांना गिळंकृत करत असल्याचा आरोप करत, शिंदेच्या दौऱ्यामागे राजकीय उद्देश असल्याचे सूचवले.