Maharashtra Mahayuti Rift: शिंदेंच्या शिवसेनेतच फोडाफोडीनं स्फोट, कॅबिनेटवरच बहिष्कार

महापालिका निवडणुका जाहीर होण्यापूर्वीच महाराष्ट्राच्या राजकारणात पक्षांतराचे सत्र सुरू झाले आहे. डोंबिवलीमध्ये भारतीय जनता पक्षाने (भाजप) उपमुख्यमंत्री एकनाथ शिंदे यांच्या नेतृत्वाखालील शिवसेनेच्या (शिंदे गट) माजी नगरसेवकांना पक्षात घेतल्याने राजकीय वर्तुळात खळबळ उडाली आहे. या पक्षप्रवेशाला ऑपरेशन कमळ असे म्हटले जात आहे, ज्यामुळे शिंदे गटात तीव्र नाराजी पसरली आहे. या नाराजीचे पडसाद मंत्रिमंडळ बैठकीत उमटले.

डोंबिवलीतील पक्षप्रवेशाच्या निषेधार्थ एकनाथ शिंदे वगळता शिंदे गटाच्या सर्व मंत्र्यांनी मंत्रिमंडळ बैठकीवर बहिष्कार टाकला. या घटनेनंतर गुलाबराव पाटील, प्रताप सरनाईक, संजय शिरसाट आणि भरत गोगावले यांसारख्या शिंदे गटाच्या मंत्र्यांनी मुख्यमंत्री देवेंद्र फडणवीस यांची भेट घेऊन आपली नाराजी व्यक्त केली.

मुख्यमंत्र्यांनी या प्रकारावर चिंता व्यक्त करत, महायुतीतील घटक पक्षांनी एकमेकांच्या नेत्यांना फोडणे थांबवावे असे स्पष्ट निर्देश दिल्याची माहिती सूत्रांनी दिली आहे. उल्हासनगरमध्ये शिंदे गटाने भाजप नगरसेवकांना पक्षात घेतल्याच्या पार्श्वभूमीवर हा ताण वाढला आहे.