CM Fadanvis : शेतकऱ्यांचा काटा मारणारे कारखाने शोधले आता त्यांना दाखवणार….फडणवीसांचा साखर कारखान्यांना इशारा

राज्याचे मुख्यमंत्री देवेंद्र फडणवीस यांनी शेतकऱ्यांचा काटा मारणाऱ्या साखर कारखान्यांना गंभीर इशारा दिला आहे. अशा कारखान्यांना शोधले असून, त्यांना लवकरच दाखवणार असल्याचे फडणवीस म्हणाले. दुसरीकडे, ऊस उत्पादकांकडून सक्तीने वसुली करणे चुकीचे असल्याचा मुद्दा राष्ट्रवादी काँग्रेसचे अध्यक्ष शरद पवार यांनी उपस्थित केला आहे. यावर फडणवीसांनी स्पष्टीकरण दिले की, अतिवृष्टीग्रस्त शेतकऱ्यांसाठी साखर कारखान्यांच्या नफ्यातून प्रति टन ५ रुपये देण्याचा निर्णय सरकारने घेतला आहे. हे पैसे एफआरपीमधून नव्हे, तर कारखान्याच्या नफ्यातून मागितले आहेत, असे फडणवीस यांनी सांगितले.

एफआरपीमधील पैसे हे शेतकऱ्यांचे आहेत, तर नफ्यातील पैसे कारखान्याचे आहेत, असे त्यांचे म्हणणे होते. सक्तीने वसुली करण्याच्या शरद पवार यांच्या टीकेला उत्तर देताना, काही जणांची शेतकऱ्यांसाठी निधी देण्याची दानत नाही, असेही फडणवीस यांनी म्हटले आहे. या निर्णयावरून सध्या महाराष्ट्रातील राजकीय वातावरण चांगलेच तापले आहे.