मराठा आरक्षणावर मोठी अपडेट! 3 वर्षांत 22 लाखांहून अधिक कुणबी प्रमाणपत्रांचं वाटप; या जिल्ह्यांत सर्वाधिक वितरण

मागील तीन वर्षांत महाराष्ट्रातील महसूल विभागाकडून ओबीसी प्रवर्गातील तब्बल २२ लाख २० हजारांहून अधिक जात प्रमाणपत्रांचे वितरण करण्यात आल्याची माहिती समोर आली आहे. न्यायमूर्ती संदीप शिंदे समितीची स्थापना झाल्यानंतर २०२३ ते २०२६ या कालावधीत ही प्रमाणपत्रे वितरित करण्यात आली आहेत.

या कालावधीत वितरित करण्यात आलेल्या प्रमाणपत्रांमध्ये कुणबी, मराठा-कुणबी आणि कुणबी-मराठा समाजाशी संबंधित प्रमाणपत्रांचा समावेश असल्याची माहिती आहे. महसूल विभागाकडून संबंधित कागदपत्रांची पडताळणी आणि प्रक्रियेनंतर ही प्रमाणपत्रे वितरित करण्यात आली आहेत.

राज्यातील विविध जिल्ह्यांमध्ये मोठ्या प्रमाणावर जात प्रमाणपत्रांचे वितरण झाले आहे. यामध्ये बीड, अहिल्यानगर, जळगाव, नाशिक, कोल्हापूर, पुणे, सातारा आणि सोलापूर या जिल्ह्यांमध्ये प्रमाणपत्रांच्या वितरणाचे प्रमाण अधिक असल्याची माहिती समोर आली आहे.

न्यायमूर्ती संदीप शिंदे समितीच्या माध्यमातून उपलब्ध झालेल्या जुन्या नोंदी आणि दस्तऐवजांच्या आधारे कुणबी, कुणबी-मराठा आणि मराठा-कुणबी समाजातील पात्र व्यक्तींना जात प्रमाणपत्र देण्याची प्रक्रिया सुरू आहे. त्यामुळे गेल्या तीन वर्षांत वितरित झालेल्या प्रमाणपत्रांची संख्या लक्षणीय असल्याचे दिसून येत आहे.

दरम्यान, मराठा आरक्षणाच्या पार्श्वभूमीवर कुणबी जात प्रमाणपत्रांचा मुद्दा अत्यंत महत्त्वाचा ठरला आहे. त्यामुळे महसूल विभागाकडून वितरित करण्यात आलेल्या या २२ लाखांहून अधिक प्रमाणपत्रांमुळे राज्यातील आरक्षणाच्या राजकारणात पुन्हा चर्चेला वेग येण्याची शक्यता आहे.