Raj Thackeray : मुंबई-गोवा महामार्गावर खड्डेच खडे; चांद्रयानावरून राज ठाकरे यांचे सरकारला चिमटे

पनवेल : 16 ऑगस्ट 2023 | गेल्या अनेक वर्षांपासून मुंबई गोवा महामार्गाचे काम रखडलेले आहे. त्यावरून मनसेकडून आज पनवेल शहरात निर्धार मेळाव्याचं आयोजन करण्यात आलं होतं. या मेळाव्यातून राज ठाकरे यांनी मुंबई-गोवा महामार्गावरून सरकारला खडेबोल सुनावले आहेत. पनवेलच्या वासुदेव बळवंत फडके सभागृहात आयोजित निर्धार मेळाव्यात बोलताना, आज मी कोणतेही मोठे भाषण करण्यासाठी आलेलो नाही. आज फक्त या आंदोलनास झेंडा दाखवण्यासाठी आलो आहे. तर देशाने पाठवलेले चांद्रयानाचा आपल्याला त्याचा काय उपयोग? चंद्रावर जाऊन खड्ड्यांचाच अभ्यास करायचा आहे. तर मग त्यासाठी चंद्रावर कशाला जायला हवं. ते महाराष्ट्रात सोडलं असतं तर खर्चही वाचला असता, असा टोला राज ठाकरे यांनी लगावला. तर केवळ कोकणचेच नाही तर महाराष्ट्रातील संपुर्ण रस्त्यांची अवस्था दयनीय आहे. आपले चांद्रयान जर चंद्रावर जाऊ शकते तर मग येथील रस्ते का चांगले होऊ शकत नाहीत असा सवाल देखील त्यांनी केला आहे.