पालिका निवडणुकीसाठी आघाडीचे सूत्र उद्धव ठाकरेंकडे?

मुंबई पाठोपाठ ठाण्यातही उद्धव ठाकरे यांच्या नेतृत्वाखालील शिवसेना (ठाकरे गट) आणि महाराष्ट्र नवनिर्माण सेना (मनसे) एकत्र लढणार असल्याची घोषणा खासदार संजय राऊत यांनी केली आहे. यात आणखी एक पक्ष म्हणून मनसेचे ठाणे जिल्हाप्रमुख अविनाश जाधव यांनी शरद पवारांच्या राष्ट्रवादी काँग्रेसचा उल्लेख केला. या तिन्ही पक्षांच्या संभाव्य आघाडीने ठाण्यात ‘७५ पार’ जागा जिंकण्याचे लक्ष्य ठेवले आहे, असे जाधव यांनी म्हटले आहे.

राऊत यांच्या म्हणण्यानुसार, महाविकास आघाडी ही विधानसभा निवडणुकीसाठी आहे, तर इंडिया आघाडी लोकसभा निवडणुकीसाठी. स्थानिक स्वराज्य संस्थांसाठी शिवसेना (ठाकरे गट) मनसेसोबत आघाडी करणार आहे, असे त्यांनी स्पष्ट केले. याचा अर्थ स्थानिक निवडणुकांमध्ये आघाडीची सूत्रे उद्धव ठाकरे यांच्या हाती असतील, असे संकेत दिले आहेत. दरम्यान, काँग्रेसने मुंबई-ठाण्यात एकला चलो रेचा नारा दिला आहे, तर भाजप आणि शिंदे गटाची शिवसेना महायुती म्हणून लढण्याची शक्यता आहे.