उज्जैनच्या नागचंद्रेश्वर मंदिरात मोठा गोंधळ! त्या अफवेने भाविकांमध्ये धवपळ, 13 हुन अधिक…

उज्जैनमधून एक महत्त्वाची आणि धक्कादायक बातमी समोर आली आहे. नागचंद्रेश्वर मंदिरात झालेल्या चेंगराचेंगरीत १३ हून अधिक भाविक जखमी झाले आहेत. ही घटना महाकालेश्वर मंदिराच्या तिसऱ्या मजल्यावरील दर्शन रांगेत घडली. मिळालेल्या माहितीनुसार, मंदिरात अचानक वीज धक्क्याची अफवा पसरली.

या अफवेमुळे भाविकांमध्ये घबराट पसरली आणि त्यामुळे जोरदार चेंगराचेंगरी झाली. नागपंचमीच्या निमित्ताने नागचंद्रेश्वर मंदिराचे दरवाजे वर्षातून एकदाच उघडले जातात. त्यामुळे दर्शनासाठी भाविकांची मोठी गर्दी जमली होती. या गर्दीतच ही दुर्घटना घडली. जखमी भाविकांना तातडीने उपचारासाठी जवळच्या रुग्णालयात दाखल करण्यात आले आहे. सुदैवाने, या घटनेत कोणतीही जीवितहानी झाली नसून, जखमींची प्रकृती स्थिर असल्याचे सांगण्यात येत आहे. प्रशासनाने या घटनेची गंभीर दखल घेतली असून, पुढील तपास सुरू आहे. अशा घटना टाळण्यासाठी मंदिर परिसरात अधिक चांगल्या गर्दी व्यवस्थापनाची आणि सुरक्षा उपायांची गरज अधोरेखित झाली आहे.