Raj Thackeray Speech : महाराजांना आपल्या कृतीतून आनंद मिळायला हवा! राज ठाकरेंचं इतिहासाबाबत परखड भाष्य; नेमकं काय म्हणाले?

पुण्यातील एका कार्यक्रमात बोलताना महाराष्ट्र नवनिर्माण सेनेचे अध्यक्ष राज ठाकरे यांनी इतिहासाकडे पाहण्याच्या सध्याच्या दृष्टिकोनावर भाष्य केले. केवळ पुतळे उभारून किंवा जयंत्या साजऱ्या करून इतिहासाप्रती प्रेम व्यक्त करण्याऐवजी, त्यातून वर्तमानकाळासाठी काय बोध घेता येईल यावर लक्ष केंद्रित करण्याची गरज त्यांनी व्यक्त केली.

ठाकरे यांनी गड-किल्ल्यांवरील गाईड्सच्या भूमिकेवरही प्रश्नचिन्ह उपस्थित केले. ते म्हणाले की, अनेकदा चुकीचा इतिहास सांगितला जातो किंवा केवळ रंजक दंतकथा प्रचलित केल्या जातात. परदेशातील किल्ल्यांवर विशेष प्रशिक्षित गाईड्स असतात, तशीच व्यवस्था आपल्याकडेही असावी अशी अपेक्षा त्यांनी व्यक्त केली.

आपले महापुरुष हे आपल्या रक्तात भिनायला हवेत, नुसते त्यांचे पुतळे उभे करून उपयोग नाही, असे मत त्यांनी मांडले. इतिहासातील घटनांमधून प्रेरणा घेऊन आपला महाराष्ट्र कसा पुढे नेता येईल आणि महाराजांना आपल्या कृतीतून आनंद कसा मिळेल, यासाठी काम करणे महत्त्वाचे आहे, असे आवाहन त्यांनी केले.