तब्बल 2 दशकांनंतर राज ठाकरे शिवसेना भवनात!

जवळपास 20 वर्षांनंतर महाराष्ट्र नवनिर्माण सेनेचे अध्यक्ष राज ठाकरे यांनी शिवसेना भवनाला भेट दिली. मुंबई महानगरपालिका निवडणुकीसाठी शिवसेना (उद्धव बाळासाहेब ठाकरे), महाराष्ट्र नवनिर्माण सेना आणि राष्ट्रवादी काँग्रेस (शरदचंद्र पवार गट) या तीन पक्षांचा संयुक्त शिवशक्तीचा वचननामा लवकरच प्रकाशित होणार आहे. या ऐतिहासिक क्षणासाठी शिवसेना भवनात प्रसारमाध्यमांची मोठी गर्दी झाली होती.

या कार्यक्रमासाठी मनसेचे नेते संदीप देशपांडे, अविनाश अभ्यंकर आणि शिरीष सावंत उपस्थित होते. राज ठाकरे आणि उद्धव ठाकरे यांच्यात वचननाम्यावर चर्चा सुरू असून, लवकरच ते पत्रकार परिषदेला संबोधित करतील. मराठी अस्मितेसाठी एकत्र येण्याचा राज ठाकरेंनी दिलेला प्रस्ताव आणि त्यानंतर हिंदी भाषा सक्तीच्या मुद्द्यावर एकत्र येण्याची घटना या एकत्र येण्यामागे कारणीभूत ठरली. मुंबईकरांसाठी कोणत्या घोषणा होतात, याकडे आता सर्वांचे लक्ष लागले आहे.