Saamana : ‘नीती-नियमां’च्या दिव्याखाली फक्त घोळ, गोंधळ अन्.. . निवडणुकीचा खेळखंडोबा, दिवसही वैऱ्याचा… सामनातून निशाणा

महाराष्ट्रातील नगरपंचायत आणि नगरपरिषद निवडणुकीच्या पहिल्या टप्प्यात साठ टक्क्यांपेक्षा जास्त मतदान झाल्याचा प्राथमिक अंदाज आहे. अधिकृत आकडेवारीनुसार, दुपारी साडेतीन वाजेपर्यंत 48% मतदान नोंदवले गेले होते. कोल्हापूर जिल्ह्यात 13 नगरपरिषदांमध्ये 79% मतदानासह सर्वाधिक उत्साह दिसून आला, तर नाशिकमधील सहा नगरपरिषदांमध्ये सायंकाळी साडेपाच वाजेपर्यंत 60 टक्क्यांपेक्षा जास्त मतदान झाले. बदलापूरमध्येही 58% पेक्षा अधिक मतदानाची नोंद झाली. 2015 च्या निवडणुकीत 56% मतदान झाले होते.

या निवडणुकीवर सामना वृत्तपत्राने तीव्र टीका केली आहे. मतमोजणी 19 दिवस पुढे ढकलल्याने निवडणुकीचा खेळखंडोबा, दिवसही वैऱ्याचा असे सामनामध्ये म्हटले आहे. मतदार याद्यांमधील घोळ, काही निकालांवर सर्वोच्च न्यायालयाची टांगती तलवार, 12 जिल्ह्यांमधील निवडणूक प्रक्रिया नियमबाह्य असल्याची निवडणूक आयोगाची कबुली आणि उच्च न्यायालयाने मतमोजणी पुढे ढकलणे यामुळे या निवडणुका गोंधळाच्या भोवऱ्यात सापडल्या आहेत. सत्ताधारी ईव्हीएम घोटाळा करू शकतात, अशी भीतीही सामनाने व्यक्त केली आहे.