Sanjay Raut : संजय राऊतांनी लिहिलं केंद्रीय गृहमंत्री अमित शाह यांना पत्र; पत्रास कारण….

शिवसेना (उद्धव बाळासाहेब ठाकरे) नेते संजय राऊत यांनी केंद्रीय गृहमंत्री अमित शाह यांना पत्र पाठवून मनोज जरांगे पाटील यांच्याशी संबंधित कथित 500 कोटींच्या ऑडिओ क्लिप बॉम्ब प्रकरणाची सखोल चौकशी करण्याची मागणी केली आहे. या प्रकरणावरून राज्याच्या राजकारणात मोठी खळबळ उडाली आहे.

राऊत यांनी आपल्या पत्रात म्हटले आहे की, हे 500 कोटी रुपये कुठून आले आणि जरांगे पाटील यांच्यापर्यंत पोहोचले का, याचा सखोल तपास होणे आवश्यक आहे. यापूर्वीही संजय राऊत यांनी या प्रकरणाची अंमलबजावणी संचालनालयामार्फत (ईडी) चौकशी व्हावी अशी मागणी केली होती. आता त्यांनी थेट केंद्रीय गृहमंत्र्यांना पत्र लिहून या गंभीर प्रकरणाकडे लक्ष वेधले आहे.

राऊत यांनी अमित शाह यांना लिहिलेल्या पत्रात 500 कोटींच्या या कथित व्यवहाराची संपूर्ण माहिती उघड करावी, असे म्हटले आहे. ही रक्कम नेमकी कोठून आली, कुठे गेली आणि याचा जरांगे पाटील यांच्याशी काही संबंध आहे का, याची शहानिशा होणे गरजेचे आहे. या प्रकरणामुळे राजकीय वर्तुळात अनेक प्रश्न उपस्थित झाले असून, या प्रकरणाच्या तपासाची मागणी जोर धरत आहे.