हातावर बड्या नेत्याचं नाव लिहून जीवन संपवणाऱ्या डॉक्टर प्रकरणी मोठा खुलासा; कुटुंबाकडून हादरवणारी माहिती समोर
सातारा येथील डॉ. रुपनवार यांच्या मृत्यू प्रकरणानंतर कुटुंबीय आणि सहकाऱ्यांकडून न्याय मागण्यात येत आहे. मृत्यूपूर्वी एक महिना सोशल मीडियावर वेदना मांडूनही प्रशासनाने दखल घेतली नाही. आता कुटुंबीयांनी आरोपींवर कायदेशीर कारवाई, एक कोटी नुकसान भरपाई आणि दोषी अधिकाऱ्याला बडतर्फ करण्याची मागणी केली आहे. प्रशासनाच्या निष्क्रियतेमुळे संताप व्यक्त होत आहे.
सातारा येथील डॉ. रुपनवार यांच्या दुःखद निधनानंतर कुटुंबीय आणि सहकाऱ्यांनी प्रशासनाच्या निष्क्रियतेवर तीव्र नाराजी व्यक्त केली आहे. मृत्यूपूर्वी एक महिन्यापासून डॉ. रुपनवार सोशल मीडियावर आपल्या वेदना मांडत होते, मात्र प्रशासनाने त्याची कोणतीही दखल घेतली नाही, असा आरोप त्यांच्या सहकाऱ्यांनी केला आहे. परिणामी, त्यांना टोकाचे पाऊल उचलावे लागले. या घटनेला तीन दिवस उलटूनही प्रशासनाकडून कोणतीही ठोस भूमिका घेतली जात नसल्याने संताप व्यक्त होत आहे. दिवंगत डॉक्टराने तानाजी सावंत यांच्या एका पदाधिकाऱ्याचं नाव घेतल्याने हे प्रकरण जास्त चर्चेत आलं होतं.
कुटुंबीय आणि त्यांच्या वकिलांनी काही प्रमुख मागण्या केल्या आहेत. यामध्ये संबंधित संशयितांवर तात्काळ कायदेशीर कारवाई करून त्यांना अटक करावी, मृत डॉ. रुपनवार यांच्या परिवाराला एक कोटी रुपयांची नुकसान भरपाई मिळावी, आणि या प्रकरणात निलंबित झालेल्या अधीक्षक मॅडम यांच्यावर केवळ निलंबन नव्हे, तर कायमस्वरूपी बडतर्फीची कारवाई करावी या प्रमुख मागण्यांचा समावेश आहे. याच उप-जिल्हा रुग्णालयात एका वर्षाच्या आत घडलेली ही दुसरी घटना असल्याने प्रशासनाच्या कार्यक्षमतेवर प्रश्नचिन्ह निर्माण झाले आहे. मुख्यमंत्री, गृहमंत्री आणि आरोग्यमंत्र्यांनी या प्रकरणात लक्ष घालून तात्काळ योग्य निर्णय घ्यावा, अशी विनंती केली जात आहे.
