Eknath Shinde : मोठी बातमी! मुंबई पालिका निवडणुकीत 50-50 चा फॉर्म्युला तर ‘या’ ठिकाणी युती…शिंदेंच्या सेनेची इच्छा काय?

मुंबई महानगरपालिकेच्या आगामी निवडणुकीच्या पार्श्वभूमीवर शिवसेनेने (शिंदे गट) महायुतीमध्ये ५०-५० जागावाटपाचा फॉर्म्युला लागू करण्याची मागणी केली आहे. ही माहिती विश्वसनीय सूत्रांनी दिली आहे. आगामी दोन-तीन महिन्यांत मुंबईसह राज्यातील इतर स्थानिक स्वराज्य संस्थांच्या निवडणुका अपेक्षित आहेत.

शिवसेनेच्या नेत्यांच्या मतानुसार, मुंबई महानगरपालिकेतील त्यांचे नगरसेवक भाजपच्या नगरसेवकांच्या तोडीसतोड आहेत. त्यामुळे जागावाटप करताना शिवसेनेला सन्मानजनक आणि समसमान वाटा मिळावा अशी त्यांची भूमिका आहे. मुंबई महानगरपालिकेची निवडणूक महायुती म्हणून लढवावी, अशी सर्व प्रमुख पक्षांची इच्छा आहे.

याचबरोबर, नाशिक, पुणे, पालघर, कल्याण आणि नवी मुंबई यांसारख्या इतर महानगरपालिकांमध्येही महायुतीने एकत्र येऊन निवडणूक लढावी, असा शिवसेनेचा आग्रह आहे. लोकसभा आणि विधानसभा निवडणुकीप्रमाणेच स्थानिक स्वराज्य संस्थांमध्येही एकजूट दाखवल्यास कार्यकर्त्यांमध्ये योग्य संदेश जाईल, असे शिवसेनेच्या नेत्यांचे म्हणणे आहे.