Mumbai Mayor | ठाकरे गटाकडून महापौर, उपमहापौरपदाचा उमेदवार कोण? फैसला थोड्याच वेळात; मातोश्रीवर खलबतं सुरू

महापौर आणि उपमहापौर पदासाठी उमेदवार देण्यासंदर्भात सध्या मातोश्रीवर महत्त्वपूर्ण बैठकींना सुरुवात झाली आहे. या बैठकीसाठी शिवसेना (ठाकरे गट) चे खासदार संजय राऊत मातोश्रीवर दाखल झाले असून, माजी महापौर किशोरी पेडणेकर यांनीही मातोश्रीवर हजेरी लावली आहे. या बैठकीत ठाकरे गटाकडून महापौर आणि उपमहापौर पदासाठी उमेदवार द्यायचा की नाही, यावर सविस्तर चर्चा होणार आहे. वरिष्ठ नेत्यांसोबत होणाऱ्या या चर्चेनंतरच अंतिम निर्णय घेण्यात येणार असून, पक्षाकडून उमेदवार देण्याचा निर्णय झाल्यास आजच अर्ज दाखल केला जाण्याची शक्यता आहे.

दरम्यान, भाजप आणि मुख्यमंत्री एकनाथ शिंदे यांच्या शिवसेनेकडून महापौर आणि उपमहापौर पदासाठी आधीच अर्ज दाखल करण्यात आले आहेत. त्यामुळे ठाकरे गटाकडून उमेदवार दिला गेला नाही, तर ही निवडणूक बिनविरोध होण्याची शक्यता आहे. मात्र, ठाकरे गटाकडून महापौर आणि उपमहापौर पदासाठी अर्ज दाखल करण्यात आल्यास ही निवडणूक चुरशीची आणि अटीतटीची होणार असल्याचे चित्र आहे. त्यामुळे मातोश्रीवर सुरू असलेल्या या बैठकीकडे आणि ठाकरे गटाच्या निर्णयाकडे राजकीय वर्तुळातून लक्ष लागून राहिले आहे.