Shirkant Shinde On Audio Clip : 500 कोटींच्या ऑडिओ क्लिपवर श्रीकांत शिंदेंची पहिली प्रतिक्रिया, म्हणाले….

मराठा आरक्षण कार्यकर्ते मनोज जरांगे पाटील यांनी नुकत्याच समोर आणलेल्या ५०० कोटींच्या ऑडिओ क्लिपवरून महाराष्ट्राच्या राजकारणात खळबळ उडाली आहे. या ऑडिओ क्लिपमध्ये ५०० कोटी रुपयांच्या व्यवहाराचा उल्लेख असून, हे पैसे खासदार श्रीकांत शिंदे यांच्या माध्यमातून जरांगे पाटलांना दिल्याचा आरोप करण्यात आला होता. या पार्श्वभूमीवर श्रीकांत शिंदे यांनी आपली पहिली प्रतिक्रिया दिली आहे.

श्रीकांत शिंदे म्हणाले की, ज्याच्याकडे हे ५०० कोटी रुपये पाठवले होते, तो माझ्यापर्यंत पोहोचला नाही. जरांगे पाटलांना जो प्रश्न पडला आहे, तोच प्रश्न मलाही पडला आहे आणि मी आता त्याला शोधायला निघालो आहे. ५०० कोटी रुपये एकत्र कसे दिसतील आणि त्यासाठी किती गाड्या लागतील यावर आम्ही चर्चा करत होतो, असेही शिंदे यांनी उपरोधिकपणे सांगितले.

मुख्यमंत्री एकनाथ शिंदे यांनी या प्रकरणाची शहानिशा करण्याचे आदेश दिले आहेत. श्रीकांत शिंदे यांनी स्पष्ट केले की, हे प्रकरण आता मुख्यमंत्र्यांच्या अखत्यारीत आहे आणि योग्य वेळी सर्व गोष्टी समोर येतील. ज्याप्रमाणे जरांगे पाटील हा मुद्दा शोधत आहेत, त्याचप्रमाणे आपणही या प्रकरणाचा शोध घेत असल्याचे शिंदे यांनी सांगितले. “तुम्हाला कळले तर तुम्ही सांगा, मला कळले तर मी सांगतो,” असे ते म्हणाले. या सगळ्या घडामोडींच्या पार्श्वभूमीवर जरांगे पाटलांनी आपल्याकडे आणखी अणुबॉम्ब असल्याचा इशाराही दिला आहे.